Nunatsinni atuisartut atugarlupput
Nunatsinni internetti atorlugu pisiniartarnermi atuisartut atugarisaat, Danmarkimi atuisartunut naleqqiullutik ajornerupput. Taama nunatsinni atuisut siunnersuisooqatigiivi isumaqarput.
Atuisut siunnersuisooqatigiivi allapput Danmarkimi Europamilu inatsisit atuisunut tunngasut ukiuni kingullerni ullutsinnut naleqqussarneqarsimasut, taamaalilluni atuisut namminersorlutik inuussutissarsiortunik eqqartuussivilersuussisinnaaneri ajornannginnerusumik aqqutissiuunneqarlutik.
Danmarkimi atuisut pisinnaatitaaffii 2002-mili inatsisitigut naleqqussarneqarput, taamaattorli taakku suli nunatsinni atuutilersinneqanngillat, atuisut siunnersuisooqatigiivi allapput.
Europami inatsisit atuisunut tunngasut naleqqusariikkat nunatsinilu inatsisit nikingagamik nunatsinni atuisunik ajornartorsiortitsisarput, soorlu internet atorlugu pisiniarnermi.
Assersuutigalugu nunatsinni atuisoq Danmarkimi oqarasuaammik angallattakkamik internet atorlugu pisereerluni pisiani ajoquteqartoq paasiguniuk europami inatsisit naleqqussakkat atorlugit naammagittaalliorsinnaatitaanngilaq nunatsinnili inatsisit naleqqussarneqanngitsut kisiisa atorlugit naammagittaalliorsinnaatitaassalluni. Taamaalilluni europami atuisunut naleqqiulluni nunatsinni atuisoq pisinnaatitaaffikinneruvoq, atuisut siunnersuisooqatigiivi allapput.
Siunnersuisooqatigiit qaammatip uuma qiteqqunnerani isumasioqatigiissitsissapput, tamatumalu kingorna nunatsinni atuisut pisinnaatitaaffiisa ullutsinnut naleqqussarneqarnissaat naalakkersuisunut kajumissaarutigineqarniarput.
