Nunatsinni attaveqaatit Canadami ikuallattoqarneranit eqqugaasut
- Canadami suleqatigisatsinni ikuallattoqarneranik pissuteqartumik Tele-Postip Canadamut attaviini ajornartorsiortoqarpoq. Tamatuma internetimik aamma SMS-imik sullitatsinnut sullissinerput sunniuteqarfigaa. Pisoq tamanna assorsuaq nalaatsorpoq, tassami Kalaallit Nunaata Kujataani imaatigut kabelimik suliaqarnermi internetimik atuineq tamarmi Canadap tungaanut imaatigut kabelimut nuunneqarnikuummat. Ajornartorsiut sukkanerpaamik aaqqinniarlugu ulapippugut, Teknikkimut IT-mullu pisortaq Jonas Hasselriis oqarpoq.
Tele-Post imaatigut kabelimik marlunnik attaveqarpoq, ataaseq Canadamukartoq ataaserlu Islandimukartoq. Kabelip aappaani ajoquteqalersinnaaneq pissutigalugu taamatut inissitaasut Tele-Postip tusagassiuutinut nalunaarummi allaaseraa, taamaattumillu internetimik atuineq kabelip aappaatigut nuunneqarsinnaaniassammat.
- Taamaatumik nalinginnaasussaagaluarpoq sullitatta ajoqummik matumatut ittumik malugisaqannginnissaa, imaatigulli kabelip pilersaarutaareersumik nuunneqarnissaata pissutigalugu sapaatip-akunnera kingullerli Islandimut attavik atorsinnaasimanngilaq, Tele-Post taama nalunaaruteqarpoq.