Kenneth Høegh nikerartuni ilaassaaq. Taanna Nuummi naalakkersuisoqarfimmi pisortatut atuuffimmit Washingtonimi sinniisoqarfimmi pisortanngussaaq.Assi: Visit Greenland

Nunatsinni atorfilittatigut nikerartoqangaatsialersoq

Nunatsinni nunanut allanut tunngasunut qaffasissumik atorfillit tamarmik akornanni atuuffinnik aggustimi nikerartoqassaaq, tamanna nunatsinni sinniisoqarfinni piginnaasaqaleriartornermik takutitsisoq, ilisimatooq isumaqarpoq.

Nunatta nunanut allanut tunngasunut tunngatillugu suliaqarfiini tamani – tassa Washingtonimi, Nuummi, Reykjavikkimi Bruxellesimilu atorfiit qaffasissut tamarmik aggustimi nikerassapput Kinamilu Beijingimi nutaamik sinniisoqalissalluni.

Sinniisoqarfinni atorfinni qaffasissuni nikerartoqarnerata annertussusaa soqutiginartuusoq, Ilisimatusarfimmit ilisimatooq, Rasmus Leander isumaqarpoq.

Nunatta nuna assigiinngitsuni sinniisoqarfii:

  • Bruxelles 1992-imili.
  • Washington 2014-imili.
  • Reykjavik 2018-imili.
  • Beijing 2021-mit.

- Bruxellesimi 1992-imi sinniisoqarfeqarpoq, tassanilu nikeralaartoqartarluni. Københavnimiinngikkaanni Nuummiittoqartarpoq. Taamaammat aatsaat siullermeertumik paarlaattoqalinngilaq, kisianni kalaallit qaffasissumik atorfillit amerlasuut nunat assigiinngitsut akornanni aatsaat siullerpaamik paarlakaatilerput, inuiaqatigiilerinermik ilisimatusarnermut immikkoortortaqarfimmi ilisimatooq, Rasmus Leander oqarpoq.

Qaffasissumik atorfillit tamarmik nikerartut

Sinniisoqarfinni pisortat tallimat Kalaallit Nunaata nunarsuarmi sumiiffinni assigiinngitsuni sinniisoqarfiinut allanut aggustimi nuussapput.

Nuummi Naalakkersuisoqarfiup pisortaa, Kenneth Høegh USA-mukarluni Inuuteq Holm Olsenip Washingtonimi sinniitoqarfik 2014-ip aallaqqaataanili pisortaaffigisaani pisortanngussaaq.

Washingtonimi pisortaq EU-mut Bruxellesimullu nuulluni Mininnguaq Kleistip pisortaaffigisaani pisortanngussaaq, Mininnguaq Kleistilu Nuummut uterluni naalakkersuisoqarfimmi pisortanngussaaq.

Jacob Isbosethsen Islandimi Reykjavikimi sinniisoqarfimmik 2018-imi aallartitsiartorpoq, taanna maanna kinamut Beijingimut assinganik ilioriartussaaq. Taassuma Reykjavikkimi atuuffia Tove Søvndahl Grantimit, nunanut allanut tunngasunut naalakkersuisoqarfimmi siunnersortaanerusumit pisortanngorfigineqassaaq.

Naak atuuffinni atuuffeqartut akornanni nuutsitserisoqaannaraluartoq tamanna Rasmus Leanderip nikititerineruinnarnani ineriartornerunerarpaa.

- Pissutigalugu kalaallit sinniisut ikinnerunikuupput, aamma siusinnerusumi qallunaarpassuunikuupput. Maanna kalaaliupput Kalaallit Nunaat sinnerlugu aallartinneqartut, maannalu ataasiinnaananilu marluinnaanngillat, kisianni kalaallit qaffasissumik atorfillit amerlasuut, Ilisimatusarfimmit ilisimatooq, Rasmus Leander oqarpoq.

Atorfinni aggustip aallaqqaataanni nikerartoqassaaq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl