Nunatsinni ataatsimeersuarniartut

Issittumi Siunersuisoqatigiit ”Arctic Council”-ip ataani pinngortitap illersorneqarnissaanut nungusaataanngitsumillu piniarnissamut suleqatigiissitami, nunatta naalagaaffik sinnerlugu siulittaasuutitaqarnera aallaavigalugu ataatsimiinnerit ingerlanneqassapput.

Suleqatigiissitaq ”Conservation of Arctic Flora and Fauna” naalisarlugu ”CAFF”-imik taagorneqarpoq.

Ataatsimiinnissaq siulleq Attaveqarnermut, Silap pissusaanut Avatangiisinullu Naalakkersuisoqarfimmit Pingortitaleriffimmillu aaqqissorneqartoq aqagu februaarip ulluisa arfineq pingajuanniit qulingata tungaanut ingerlanneqassaaq. Tassani issittup imartaani timmissat pillugit immikkut ilisimasallit ilisimatuussutsikkut misissuisarnerit taakkualu malillugit qanoq iliuuseqartarneq oqalligissavaat.

Nunanit tamaneersut ataatsimiinnissaat tulleq, CAFF-imi siulersuisut ataatsimiinnerissavaat Avatangiisinut Naalakkersuisoqarfimmit aaqqissorneqartoq. Ataatsimiinnermi tassani uumassusillit assigiinngitsut tamarmik immikkuullarissumik nakkutigineqartut nalunaarsorneqarneri pillugit suleqatigiinnerup ingerlateqqinneqarnissaa oqallisigineqassaaq, issittumi pinngortitap uumassusillillu tamaani nassaarineqarsinnaasut ataatsimoortillugit takuneqarsinnaalernissaat anguniarneqassalluni.

Ataatsimiinnerit tamarmik Nuummi ingerlanneqassapput.

CAFF-imi Kalaallit Nunaata siulittaasuutitaqarnera 2009-mi upernaap tungaanut ingerlassaaq, issittumilu uumassusillit assigiinngiiaartut, pinngortitap assigiinngiiaarnerujussua silallu pissusaata allanngoriartornera pillugit Kalaallit Nunaata sunniuteqarnerata taamanikkussamut malunnaateqarnerulersimanissaa qularnanngilaq.