Nunatsinni assigiimmik ineriartortoqarli
Siumup siulittaasuata nalunaarutaa akunnerit sisamat oqallisigineqareerluni, ippassaq unnukkut kingusissukkut ataatsimeersuartunit akuersissutigineqarpoq.
Siulittaasup Hans Enoksen-ip nalunaarutaa malunnartumik nunaqarfimmiunit iluarisimaarneqarpoq, illoqarfissuarmili Nuummeersut paaserusutaat mittarfeqarnermut tunngasut aammalu umiarsualiveqarnermut tunngasut, iluamik suli akineqanngitsut, Nuummi borgmesterip Agnethe Daviden-ip oqaatigaa.
Siumup ataatsimeersuarneranut Kullorsuarmiit aallartitaaasoq, Paulus Olsen oqarpoq Naalakkersuisoqartalermalli aatsaat siullerpaamik nunaqarfimmini Kullorsuarmi malugisaminnik Hans Enoksennimit orninneqarlutillu tusaaniarneqarsimasut.
Hans Enoksen Kullorsuarmut 2004-mi tikimmat inissaqarniarnermut ajornatorsiutit qaangerneqarsimalersut Paulus Olsen oqarpoq.
Nunaqarfimminni malugisinnaanerarpaa nunaqarfimmiut naalakkersuinermik sulialinnit tikinneqartarnissartik pisariaqartittaraat.
Paulus Olsennip aamma assersuusiaraa meeqqat atuarfiat iluarsagassaq kommunimit akissaqartinneqanngitsoq, Hans Enoksenip Kullorsuarmut tikeraarnerata kingorna akissaqartinneqalersimasoq, tassa Namminersornerullutik Oqartussanit, atuarfik allaat eqqaarsaartarfeqalissasoq. Paulus Olsen isumaqarpoq nunatsinni assigiimmik ineriartorneqartariaqartoq.
