Nunatsinni assammik arsartartut angutit pikkorinnersaat Nuummi katersuupput
Assammik arsartartut angutitaasa sungiusarlutik katersuutsinneqarnerinut peqataasut naliliiffigineqartussaassapput. 2013-imi unamminissanut pissanganartunut peqataatitassatut piukkunnassuseqarnerup Niels Møllerimut takutinnissaanut sapaatip akunnerata naanerani periarfissaqarpoq.
-Unammisartut qanoq sungiusarluarsimatiginersut ilisimanngilara. Kalaallit Nunaannili sungiusartarneq Danmarkimut naleqqiullugu annikinnerungaatsiarpoq, aamma timersoqatigiiffiit unammisarneri akuttunerupput. Taamaammat sungiusarluarsimanissaat pingaaruteqarpoq, tamannalu sapaatip akunnerata naanerani naliliiffigissavarput, Niels Møller knr.gl-imut oqaluttuarpoq.
Danmarkimi nunanut allanut unammisartut U-21-t VM-imut peqataanissaminnut piareersaatitut Kalaallit Nunaata nunanut allanut unammisartui A-t unammisussaavaat. Tamanna Niels Møllerimut ikiortaanullu Kristian Kristiansenimut unamminartupilussuussaaq. Danskit nunanut allanut unammisartui U-21-t nunarsuarmi pikkorinnerit ilagaat, taamaammat nunanut allanut unammisartut ilungersortitaasussaassapput.
-Uatsinnut unamminartupilussuussaq, unammisartunillu kajumilersitsiniarnermut iluaqutaanngitsoornavianngilaq. Tamanna maanga Nuummut katersorsimasatsinnut, qaammatillu naalernerani Danmarkimi katersortitassatsinnut atuuppoq. Unammillerneqarpugut, Panamerikamiullu anngunniullutik unammisaqattaarnissaannut ukiup naalernerani pisussanut sungiusarluarsimanissamut sakkortusaataaginnassaaq, nunanut allanut unammisartunut sungiusaasoqatigiit naqissusiipput.
Aningaasartassai iluatsinneqassappata, anngunniunnerit Nuummi oktobarip qaammataani ingerlanneqassapput. Iluatsinneqassappallu Kalaallit Nunaanni Assammik Arsartartut Kattuffianni ulappunnersuaqalissaaq. Aaqqissuusineq naammassiniarlugu ilungersorluni sulisoqassaaq, pilersaarusiortoqarluni isumaqatigiinniartoqarlunilu.
-Pilersaarutivut avammut saqqummiunnagit sivisuumik ingerlappagut, unamminerillu Kalaallit Nunaanni ingerlanneqarnissaannut tamakkiisumik tapersersorneqarpugut. Nunat tamat akornanni aammali Panamerikamiut assammik arsartartuisa kattuffiannit. Kattuffimmut nunamullu tamarmut annertuupilussuussaaq. Inuppassuit Kalaallit Nunaannut tikissapput, ingerlaqqinnissamullu anngunnissatsinnut periarfissagissaarnitta saniatigut aamma Kalaallit Nunaata avammut nittarsaannissaanut periarfissaassaq immikkuullarissoq, Elise Bruun GHF-imeersoq, Panamerikamiut siorna unammersuarnerisa kingorna pilersaarusioqataasimasoq oqarpoq.
