Nunatsinni arfattassaarunnissaq ernummatigaat
Taamakkaluartoq Naalakkersuisut qulakkeerillutik oqarput, arfernik angisuunik pisassinneqarnissaaq ukiuni tulliuttuni inissinneqarumaartoq.
Arfernik pisassinneqarnissamik Naalakkersuisut qinnuteqaataat arfanniarneq pillugu ataatsimiitaliarsuarmi, IWC-mi, ilaasortanut maanna tusarniaassutigineqarput. Siunnersuutigineqartut siusinnerusukkut itigartitsissutigineqarput.
Arferit qinnutigineqartut tassaapput:
Tikaagulliit 178-it, arfiviit marluk, qipoqqaat qulit tikaagulliusaallu 19-it,
tikaagulliillu aqqaneq-marluk Tunumit qinnutigineqarput.
Naalakkersuisut siunnersuutaat KNAPK-mit tapersersorneqarpoq.
- Pisuussutinik uumassusilinnik sumiluunniit uanilu pineqartumi arfernut tunngatillugu aqutsinermi sulinermilu atuisut oqartussaaqataanerat tunngaviulluinnartariaqartoq KNAPK-mit isumaqarpugut, Leif Fontaine oqarpoq.
Inerteqquteqartitsiniarnerillu aallaaviginagit nunat tamalaat akornanni suleqatigiinnerup inuppalaassutsimik akaareqatigiinnermillu aallaaveqarnerusumik inuiaqatigiit, naalakkersuinermik suliallit nunarsuarmioqatigiillu akornanni aamma tunngavissinneqarnissaa paaseqatigiissutigineqarnissaalu susassaqaqatigiit akornanni maannamut annertunerusumik sulissutigineqartariaqartoq, KNAPK-ip siulittaasua, Leif Fontaine, tusagassiuutinut nalunaarummini allappoq.
