Nunatsinni allannguinerit annertuut pisussanngorput

Ukiut tulliuttut pingasut Kalaallit Nunaanni allannguinerit annertuut pisussaapput nunatta nunarsuarmioqataanermi peqataanerulernissaa anguniarlugu. Aningaasaqarnermut Naalakkersuisoq Maliina Abelsen IA siunissaq pillugu annertuunik pilersaaruteqarpoq.
maajip 18-at 2012 13:35

Akileraartarnermik, soraarnerussutisiaqarnermi inissiaateqarnermilu allannguinerit annertuut ukiut tulliuttut pisussanngorput, akileraartarnerlu eqqarsaatigalugu siunissaq ungasinnerusoq isigalugu aaqqissuussinissat Naalakkersuisut eqqartulereerpaat, tassani anguniarneqarpoq ukiut 2100-ussaanni nunarsuamioqatigiit piumasaannut nunatta angummassinnaalernissaa.

- Akileraartarneq siullertut misissorparput neriuppugullu sulinermut akileraatut 1 procentimik appartissinnaassallugu. Sulineq imminut ikiorsiissutisinermit akilersinnaanerusariaqarpoq, ullumikkullu taamaappasinngilaq. Sulinermi isertitanit akileraarutip appartinneratigut suliffeqarnissaq pilerinarsarniarparput. Aningaasallu tassunga atugassat assigiinngitsunit aaneqassapput sumiillu aaneqarnissaat oqallisigileruttorparput, Maliina Abelsen oqarpoq, nunatta siunissaa pillugu eqqarsaatersorluni.

Ullumikkut inuit Nunatsinnut tikittut sulisinnaapput najugaqarsinnaapput, utaqqiisa najugaqarsinnapput, taamaattuaannarnissaali ilimananngilaq. Tamakkulu siunissami akitsuusersornissaat isumaliutigineqarpoq. Sorpassuilli kalluarneqartussaammata oqallisigineqaqqaartussaavoq.

- Assigiiaartumik akileraariaaseqarnikkut akileraarutip appartinnera equngasumik aamma eqquisinnaavoq, tamatumalu iluarsiissutissaa nassaarisariaqarpoq akileraartarnermi iluarsartuusseqqinnerup eqquinerlunnginnissaa anguniarlugu. Oqaluuserineqarsinnaasut tassaapput ernianut ilanngaatit, isertitat akileraarusersornerat aammalu inuussutissarsiortut oqilisaavigineqarnissaat oqaluuserineqarsinnaavoq oqimaaqatigiissumik aaqqiissuteqassagaanni, Aningaasanut Naalakkersuisoq Maliina Abelsen oqarpoq.

Naalakkersuisut pingaartippaat allannguinerit misissuilluaqqaarluni pinissaat aammalu allannguinissat pillugu innuttaasut sukumiisumik nassuiaanneqarnissaat. Taamaasilluni allannguinernut innuttaasut akisussaaqataanissaat anguniarneqarpoq innuttaasut ulluinnarni atugaat kalluarneqartussaammata.

- Maannamut suliavut pillugit innuttaasunut paasissutissiisarnerput pitsaavallaarsimanngilaq, allanngortiterinerilli nalaani tamanna iluarsissavarput. Ataatsimut eqikkarlugit oqaatigisinnaavarput 2040-up tungaanut ukiumut 1 milliard koruuninik nassaartarnissarput allannguinerit ataqatigiissappata. Oqarsinnaavugut anguniagarput aalajangiusimavarput tamatumalu anguniarnerani aqqusaagassat oqaluusererusuppagut. Matumani pingaarpoq siunissami uuliamit aatsitassanillu isertinneqarsinnaasut isumalluutigivallaarnaversaarnissaat. Aalajangersimavugummi taakku aatsitassat pillugit aningaasaateqarfipput tuttassasut taamatullu aalajangersimanerput allanngortinnavianngilarput, Maliina Abelsen oqarpoq.

Taanna qilanaarnerarpoq allannguinissat pillugit pingasoqiammik oqaloqatigiinnissanut siunissami allannguinissat pillugit isummat amerlanerit tusarniarlugit.