Akiuussutissalersuinissamut aana pilersaarut

Covid-19-imut nunarsuarmi sumi tamani akiuussusersuileruttorput, Nuummilu utoqqaat illuanni Ippiarsummi najugalik nunatsinni siullersaalluni ippassaq kapitippoq. 

Nunarput akiuussutissanik aallaqqaammut 1000-inik Danmarkimiit pissarsivoq. Akiusutissat killeqarmata, nunatsinni peqqinissamut oqartussat, assersuutigalugu Danmarkimisulli, kikkut akiuussutissalerneqaqqaarnissaannut pilersaarusiorsimapput.

Coronamik suliaqartut allatseqarfianniit tusagassiutinut taama allapput.

Nuummi akiuussutissalersuilereerput. Ippiarsummi najugaqartut 30-it sulisullu 50-it akiuussutissaligassaapput. Dronning Ingridip napparsimmavissuani sulisut 90-it ataasinngornermi amerlaqataallu marlunngornermi akiuussuserniarneqarput.  

Nunap immikkoortuani peqqissaasut pisortaat, Inuuti Fleischer, KNR-imut paasissutissiivoq.

Akiuussutissat nillertumiittariaqartut

Aamma Ilulissani akiuussutissalersuinissamut piareersarput. Akiuusutissat poortat ataatsit Nuummiit timmisartuunneqarput oqartussallu marlunngornermi januaarip tallimaani aallartissinnaassallutik naatsorsuutigaat.

Tulleriiaarineq imatut isikkoqarpoq: Innuttaasut 75-inik amerlanerusunilluunniit ukioqalereersimasut tamarmik.
Utoqqaat angerlarsimaffiini najugaqartut (ukiui apeqqutaatinnagit).
Utoqqaat angerlarsimaffiini sulisut, angerlarsimaffinni ikiortit aamma peqqinnissaqarfimmi sulisut toqqartukkat, tamarmik sulinerminni napparsimasunik annertuumik attaveqartut.
Inuit immikkut ittumik ulorianartorsiortut (peqqinnissaqarfimmit toqqartorneqassapput)
Tusarfik: Coronamik suliaqartut allatseqarfiat

Ilulissani utoqqaat illuanni napparsimmavimmilu sulisut siullertut akiuussutissalerneqassapput. Taava innuttaasut Sermermiuni kapitissinnaalissasut, Coronamik suliaqartut allatseqarfiat allappoq.

Covid-19-imut illersorneqassagaanni sapaatit akunnerinik pingasunik akunneqartumik marloriarluni akiuussutissalerneqarnissaq pisariaqarpoq. Nakorsaatit pillugit aqutsisoqarfiup allaaserisaa naapertorlugu kapititut amerlanersaat ippigusuttarsimapput, kapitiffikkut aappillerlutik, kissarneqalaarlutik ujallukkullu annialaartarlutik. Tamarmik sivikitsuinnarmik. 

Innuttaasut akiuussutissaligassat peqqinnissaqarfimmit ukiui nappaataallu ilisimaneqartut aallaavigalugit toqqartorneqarput toqqaannartumillu attavigineqassallutik. Taamaammat akiuussutissalertinnissamut piffissalerneqarumalluni napparsimmavimmut corona-hotlinemulluunniit sianernissaq pisariaqanngilaq. 

Nunatsinni illoqarfinni taakkunani sooq aallartittoqarnersoq, ilaat immaqa aperisinnaapput. Akiuussutissat passunneri, angallanneri paarinerilu pisariusut, Corona pillugu allatseqarfimmiit allapput.

Akiuussutissat nakorsaasiorfimmit Pfizer and Biontec-imeersuupput, taakkualu -70-ip aamma -80-ip akornanni nillissusilimmiittussaapput. Taava aassernera passunneralu tamarmi immikkut ilinniarsimasunit isumagineqartussaalluni.

Akiuussutissat nassiunneqartussat tullii nassiukkuminarnerullutillu paariuminarnerunissaat sulissutigineqarpoq, taamaalilluni nunatsinni amerlanerusuni ataatsikkut akiuussutissiisoqarsinnaalissammat.