Nunatsinni aatsitassarsiornerup siunissaa Sulisitsisut ernumagaat

Fraser Institutep nunat assigiinngitsut akornanni aatsitassarsiorfissatut aningaasaliiffigumaneqarnerpaat pillugit ukiumoortumik misissuinerani Nunatta inissisimanera appariarujussuarpoq.

Taamaattoqarnera nunarsuarmi aatsitassat akiisa nunani tamani qaffakkiartorneranni pimmat ajortoq, Sulisitsisut Peqatigiiffianni pisortaq Brian Buus Pedersen oqarpoq.

- Akit qaffakkiartorneranni kingusinaarluni qisuariaraanni angumersinngitsoortoqartarpoq. Taava akit appariartorneranni aatsaat iliuuseqaratartoqarsinnaavoq. Taammaammat qisuariapallanissaq pisariaqarpoq, Brian Buus Pedersen oqarpoq.

Akit qaffakkiartorneranni ukiut qulit tikillugit periarfissaqarajuttoq taanna nassuiaavoq. Tamatumalu kingorna periarfissap tullianut sivisoorujussuarmik utaqqisoqarsinnaavoq.

- Taamaammat ingerlallualernerup nalaani Nunatta nunanut allanut aningaasaliisussarsiorluni unamminermi pilerinannginnerusutut nalilerneqarnera avaanngunarpoq.

Fraser Institutep nunat assigiinngitsut akornanni aningaasaliiffigiumaneqarpaat  pillugit ukiumoortumik misissuinerani Nunarput arfineq-aappaattut 2013-imi inissisimavoq, siornali tassa 55-imi inissilluni.

Tamanna amerlasuunik pissuteqartoq, ujarassiuup Ole Christiansenip oqaatigaa, ilaatigut Nunatta attaveqatigiinnikkut atortulersuutilunnera akileraarnermilu aaqqissuussisimanera pissutigalugit Nunatsinni aatsitassarsiorneq akisoorujussuusoq oqarluni.

Misissuinermilu apersorneqartut kinaassutsiminnik isertuussigamik, kinguneqarnerlunnissaanik ernumassuteqarnatik akissuteqarsinnaasut, Christiansenip oqaatigaa.

- Taamaammallu isumaqarpunga Kalaallit Nunaanni pisortat oqartussallu maalaarutinik allassimasunik tusarnaartariaqartut, taavalu aamma aatsitassarsiornikkut siuariaatoqqissagutta pitsanngorsaataasinnaasut aamma ujartorlugit, Nunatsinnilu aatsitassarsiortoqalissappat tamanna nunatta karsianut iluaqutassaqimmat, Brian Buus Pedersen Ole Christiansenitut kaammattuuteqarpoq.

- Aalisakkanik avammut tunisineq kisimi isumalluutigaarput, Nunatsinnilu aningaasaqarnerput aalisakkat akiisa allanngornerannit sunnertiasuararsuuvoq. Raajallu qalerallillu akii apparpata, appartussaasullumi nalunngilarput, isertititanik allanik  matussusiisinnaanngilagut. Taamaammat inuussutissarsiornikkut ingerlatsinerput assigiinngiiaarnerusunut siaruartittariaqarparput, Brian Buus Pedersen oqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat