Nunatsinni aallartitaqarfeqalerniartut

Nunanut allanut tunngasunut naalakkersuisup Aleqa Hammondip Amerikamiut Danmarkimi aallartitaat James Cain sapaatip akunnerani kingullermi pingasunngormat ataatsimeeqatigaa.

Ataatsimeeqatigiinnermi Amerikamiut nunatsinni aallartitaqarfeqalerusunnerat ilaatigut oqaluuserineqarpoq.

Aleqa Hammond Atuagagdliutinut oqarpoq, maanna Amerikamiut nunanut allanut ministeriata Condoleezza Ricep maajimi ataatsimeeqatiginissaa sulissutigigini.

- Amerikamiut nunatsinni aallartitaqarfeqalernissaannut taamaalilluta Amerikamiut uagullu piareersarluarsimanerussaagut, Aleqa Hammond aviisimut oqarpoq.

Matumani piareersarneqartussat ilaatigut taassaallutik aallartitaqarfiup allaffeqarfissaa aamma sulisut najugaqarfissaat. Aallartitaqarfeqalernissaaq upernaamut atsiorneqarpat, aallartitaqarfik 2008-mi aasakkut ammarneqarsinnaassaaq. Aallartitaqarfik aallaqqaammut aasaanerinnaani ammasassaaq, tassa Air Greenlandip Baltimoremut timmisartuussisarnerata nalaani.