Nunatsinni aalakoorlutik biilertutut nalunaarsorneqartut amerleriartut

Politiit biilertunik nakkutiginninnerulernerat, innuttaasullu unnerluutiginninnerulernerat aalakoorlutik imigassartorsimallutilluunniit biilertutut nalunaarsorneqartut amerleriarnerannut peqqutaasoq politimesteri nassuiaavoq.
- Kalaallit Nunaanni aalakoorlutik ullumikkut biilertartut ukiunut siuliinut sanilliullugu amerlanerusutut taassallugu tunngavissaqanngilaq, Bjørn Tegner Bay oqarpoq. Assi © : KNR
Allattoq Aviâja Kilime
oktobarip 18-at 2019 09:22

Nunatsinni aalakoorlutik biilertutut politiinit nalunaarsorneqartut 2014-imi 98-ioriarlutik siorna 2018-imi 205-iupput. Imaanngilarli aalakoorlutik biilertartut amerliartortut politimesteri nassuiaavoq.

- Kalaallit Nunaanni aalakoorlutik ullumikkut biilertartut ukiunut siuliinut sanilliullugu amerlanerusutut taassallugu tunngavissaqanngilaq, Bjørn Tegner Bay oqarpoq.

Politiit nakkutiginninnerulernikuunerat amerlanerit aalakoorluni biilertutut nalunaarsorneqarnerannut politimesterip pissutaasoraa.

- Aalakoorlutik biilertut politiinit ukkatarineqarnerulernikuunerannik tunngaveqarsoraara. Ulluinnarni aalakoortunik biilertunik alapernaarsuinigut siornatigumut sanilliullugu eqqumaffiginerulernikuuagut.

Aalakoornartutorsimatilluni promilli 0,5 angusimatillugu biilerneq inatsimmik unioqqutitsineruvoq.

Immiaaraq 33 centiliteriusoq arnamit 58 kilomik oqimaasuseqartumit imerneqarpat, 0,2 promille anguneqarsinnaavoq.

Aalakoorlutik biilersimasut politiinit suliassanngortinneqartarnerisa taama amerlanerutigilernerat innuttaasunit kalerriisoqarnerusalerneranik pissuteqartoq, politimesteri nassuiaavoq.

- Tassalu imigassartorsimallutik biilertunut inuiaqatigiit isumaat allanngorpoq. Inuit uagutsinnut ukiunut siuliinut sanilliullugu kalerriinerusalernikuupput, tamannalu suliat amerlinerinut nassuiaataasinnaavoq.

Aalakoorlutik biilersimasut politiinit suliassanngortinneqaraangata qanoq aalakoortigisoqarnera aallaavigalugu akiligassiisoqartarpoq, biilernermullu allagartaq piffissaligaasumik arsaarinnissutaasinnaalluni. Aalakoorlutit siornatigut biilertarsimanersutit aamma apeqqutaavoq. Biilersinnaanermut allagartaq arsaarinnissutigineqarsinnaavoq aamma qaqugorsuarmut biileqqittussaajunnaarsitsisoqarsinnaalluni.