Nunatsinneersoq Hanne Christensen USA-mi ukiuni tallimani najugaqarpoq.Assi: Privatfoto: Hanne Christensen

Nunatsinneersut USA-mi najugallit akerliussutsimik takutitsinerit pillugit: Ernumanarput

Taartumik amillip George Floydip politiinit tigusarineqarnermi kingorna toqunera USA-mi aalassatsitsivoq. Akerliussutsimik takutitsinerit sakkortuut nunatsinneersunit USA-mi najugalinnit nalaanneqarput.

Angutip taartumik amillip sakkulisanngitsullu politiinit tigusarineqarnermi kingorna toqunera pissutaalluni sakkortuumik akerliussutsimik takutitsisoqalerpoq.

Sumiiffinni arlalippassuarni eqqissiviilliortoqaraluartoq, Maine New Yorkip avannaaniittoq eqqissisimaneruvoq.

Nunatsinneersoq, Hanne Christensen, USA-mi ukiuni tallimani najugaqarpoq.

- Silatitsinni eqqissiviilliortoqanngilaq. Uanga ungasissumi najugaqarama. Taamaammat malinnaassaguma akunneq ataaseq akunnerulluunniit aappaa avillugu biileqqaarlunga malinnaasinnaavunga, Hanne Christensen oqarpoq.

Taanna aqagu akerliussutsimik takutitseqataanissaminut pilersaaruteqarpoq.

- Pissutigalugu inuit naligiissitaanissaat pingaartikkakku, taanna oqarpoq.  

Akerliussutsimillu takutitseqataanermini USA-mi allannguisoqarnissaa neriuutigaa.

- Neriuppunga politiit malittarisassaat nutarsarneqassasut.  

Eqqaanni eqqissiviilliortoqartoq

Bolethe Sells Lynchburgimi USA-mi naalagaaffimmi Virginiamiittumi najugaqarpoq.

Ilulissaneersoq Bolethe Sells USA-mi ukiuni 19-ini najugaqarpoq, erninilu marluk tassani najugaqatigalugit.

Najugaqarfigisaatalu eqqaani eqqissiviilliortoqartoq, Bolethe oqarpoq.

Assi: Bolethe Sells ernerilu marluk. 

- Minutsit qulit missaannik pisullugu takusinnaavakka, Bolethe Sells oqarpoq. 

Bolethekkummi inigisamik ungasinngisaani ippassaq unnukkut aallaatittoqarsimavoq.

- Pisiniarfinnut allaat aserorteralutik, pisiniarfippassuit suliffeqarfippassuit, tamakkua suunngitsut tamaasa saassutaarivaat, Bolethe Selss oqarpoq.

Taamaattumik Bolethep akerliussutsimik takutitseqataanissaminut pilersaaruteqanngilaq, Bolethemullu eqqissiviilliornerit sunniuteqarnerluttut, taanna oqarpoq.

- Sunniutaa imatut misiginarpoq aninissaq mianernarninngorpoq massakkut. Virusip qaavatigut aamma alla, Bolethe Sells oqarpoq. 

Qujamasunneruliinnartoq

Mira Kleist New Yorkimi najugaqarpoq. Tassani aamma eqqissiviilliortoqarmat unnukkut aneqqusaanngilaq.

- Qujanartumik maani misigivallaanngilara. Brooklynip avannaani Williamsburgimi najugaqarama, Mira Kleist oqarpoq.  

Akerliussutsimik takutitsisut Manhattenimiinnerupput.

Mira Kleist USA-mut 2018-imi nuummalli pisorpassuusimapput.

Coronavirusip tuniluunnerata saniatigut akerliussutsimik maanna takutitsisoqarpoq.

Pisulli imminut nukittorsaataaginnartut, Mira oqarpoq.

- Imatorsuaq misiginngilanga sunnerterujussuarlunga misigissutsikkut aamma nalunnginnakku inuppassuit uanniit ajornerusut. Uanga toqqissisimavunga, peqqippunga, pisariaqartitakka tamaasa pigaakka. Suliffeqarpunga, ullut tamaasa sulisarpunga. Taamaattumik immaqa qujamasunneruliinnarpunga. Pisinnaatitaaffikka taavalu aamma periarfissakka pillugit, Mira Kleist oqarpoq. 

George Floydip toqunerata kingunerisaanik USA-mi kisimi akerliussutsimik takutitsisoqanngilaq, Europamimi allaat akerliussutsimik takutitsisoqarpoq.

 

Qanoruumi ilanngutassiaq uani takusinnaavat: 

USA-mi akerliussutsimik takutitsinerit

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat