Sisoraaserlutik ooqattaasartartut nunarsuaq tamakkerlugu kattuffiata IBU-p, nunallu tamalaat OL-eqartarneq pillugu ataatsimiititaliaata IOC-ip, Italiami Martellimi sungiusaqatigiissitsinertik sapaatiummat naammassivaat. Sisoraaserlutik ooqattaasartartut inuusuttut nunanit 19-ineersut, matumani Kalaallit Marika Magnussen aamma Max Kreutzmann ilanngullugit sungiusaqatigiipput.

Nunani minnerni inuusuttut pikkorissut piorsarneqarnissaat siunertaavoq, Ukaleq Slettemarkilu sungiusaqatigiinnernut assingusunut siusinnerusukkut peqataanikuuvoq. IBU-p pisortaa, Arne Eidam oqarpoq.

Taamatut sungiusaqatigiittoqarnera sisoraaserlutik ooqattaasartartunut iluaqutaassaqisoq, inuusuttut marluk sungiusaasuata Øystein Slettemarkip qularutiginngilaa, pingaartumik ooqattaasarnermut tunngatillugu.

- Ujakkaallaqqissuupput, ooqattaasarnerli suli sungiusimanagu. Ineriartupiloorpulli, sapaatimmi-akunnerata ataatsip ingerlanerinnaani siuariartupiloorput, Øystein Slettemark oqarpoq.

Nuummi 10 meteritut takitigisumi luftgeværilerlutik sungiusartartut taassuma nassuiaatigaa, sisoraaserluni ooqattaasarnermi qoorortuuaraq atorneqartarpoq, ooqattaasartarfillu 50 meteritut takitigaluni.

Pingaartumik ooqattaasarneq, sakkumillu passussineq, 18-inik ukiullip Max Kreutzmannip sungiusarnermi pingaartippaa:

- Taama sungiusarneqarluni ilikkagaqarnartorujussuuvoq, qoorortuuaraq qanoq ilillugu piareersapallanneqarsinnaanersoq, ooqattaasartarfimmut anngukkaanni piareersarneq allallu. Nuanneqaaq taama sungiusarneqarluni, Max Kreutzmann oqarpoq.

Peqataangaalersut

Max Marikalu ulluni makkunani Italiamiipput, inuusuttut Martellimi IBU Junior Cupimi sapaatit-akunnerata naanerani unammiuaarnissaannut nunarput sinnerlugu peqataassallutik.

- Unammiuaarnermi peqataassaagut, kisianni angusarissaassanerluta soorunami naluarput, unammiuaarnermili takutitsilluarnissarput pingaartipparput, misilittagaqalerluta. Tassa pingaarnerutitarput, Øystein Slettemark oqarpoq.

Marika Magnussen Max Kreutzmannilu unammiuaarnermi pisortatigoortumik siullerpaamik peqataassapput, Max Kreutzmannilu annilaangalaaraluarluni unamminissamut peqataanissani qilanaaraa:

- Unamminissani peqataanissara qilanaaraara, ilikkagaqarfigissavara, siunissamilu sisoraaserlunga ooqattaasartartutut imminut isigisinnaavunga, 18-inik ukiulik Max Kreutzmann oqarpoq.

Sasja Joelsen Inuk Slettemarkilu sapaatit-akunnerata massuma ingerlanerani aamma tikissapput. Taakku Kalaallit Nunaat sinnerlugu IBU Junior Cupimi sapaatit-akunnerata naanerani aamma peqataassapput.