Nunatsinneersut nipilersullammaat Nunavimmut tusarnaartitsiartussapput
Fali Kleist aamma Leo Rosing, nipilersortartuni 1970-ikkunni nuannerineqaqisuneersut, Fali, Kasper aamma Leo, aamma 1980-ikkunni nipilersortartuni Aalukkunni peqataasarsimasoq, Iisaavaraq Petrussen, Aqpik Festivalimut, Nunavimmi aasaanerani 1995-imili ingerlanneqartalersumut, nuannarineqaqisumullu, qaaqqusaasimapput.
Aqpik Jam aggustimi sapaatip akunnerata aappaani ingerlanneqartuaannarpoq, nipilersortartut 40-t missaanniittut, nipilersortartullu allat Canadap Issittortaaneernerusut, tusarnaariarpassuillu katersuuttarput, Canadallu Issittortaani najugallit nipilersortunik tusarnaariaasarput, nunanneqisumillu naapeqatigiittarlutik.
Ukioq manna aaqqissuisut kalaallit 1970-ikkunni 80-ikkunnilu rockimik inuiaallu nipilersugaannik tusarnaarusussimapput.
Falip, Leop Iisaavaqqallu peqatigissavaat erinarsortartoq nuannarineqarluartoq, Lone Josefsen, aamma Iisaavaraq Petrussenip ernera, Inunnguaq, nipilersoqatigalugulu erinarsoqatigissallugu.
Nipilersortartut aqqut sivisoqisoq Københavnikkoorlutik atortariaqanngilaat, Aqpik Jamimik aaqqissuisut timmisartoq attartugaq uummukartinniarpaat, taamaalillutik nipilersortartut nipilersuutaallu Davis Strædip illuatungaanut apuutissallugit. Festivaleqarneq tallimanngornerup tungaanut pissaaq, nipilersornerullu saniatigut allanik aamma aaqqissuisoqarniarpoq, bingortitsisoqassaaq, aamma golferluni pokerimillu pissartanngorniuttoqassalluni, aammalugooq kaagiliullammanngorniuttoqassaaq, aviisimi Nunatsiaq Newsimi tamanna oqaluttuarineqarpoq.
