Nunatsinneersut kuultit pinnersaasiarineqarput

Nunatsinnersut pinnersaatit kuultitallit Kunngissakkunnit kisimik atorneqaratik kikkunnit tamanit atorneqarsinnaalerput. Pinnersaatit kuultisiorfimmit Nalunamit kuultitalersukkat Danmarkimi kuultinik saffiortumit Nicolai Appelimit saqqummersinneqartut takusarneqarsinnaapput. Kuulti nunatsinneersoq saqqummersitsisup immikkuullarissutut isigaa.

-Paasinnikkiartornera malillugu paasivara kuulti suunersoq oqarsinnaavungalu kuulti una immikkuullarissuusoq, Galerie Metalimi saqqummersitsisoq Nicolai Appel oqarpoq.

Kuulti imaaliallaannarlugu pisiarineqarsinnaanngikkaluartoq taassuma Nalunami kuultisiorfimmit kiilup aappaata affaanik oqimaassusilik ilungersorluni pisiarisimavaa.

Ippassarlu saqqummersitsivimmi assammiut, ujammit kappoqqutillu immikkuullarissut saqqummersinneqarnerat ammaanersiorneqarpoq.

Ujarassiooq Minik Rosing saqqummersitsinermik ammaasuuvoq.

-Kuultip nunatsinneersup atorluarneqaleriartornera nuannaarutigaara imaallaat nunarput iluanaaruteqaleriartussaaq, Minik Rosing ammaanersiorluni oqalugiarami oqarpoq.

Pinnersaatit amerlanerit akoqartippiarnagit kuultiinnangajaatillugit pinnersaasiarineqarput, soorlu 18 imaluunniit 24 karatinngortillugit, Nicolai Appel oqarpoq. Aperineqarami kuulti nunatsinniittoq sumut atorsinnaanersoq, ima akivoq:

- Kalaallit Nunaanni kuultitalinnik ujarappassuaqarpoq taamaattumik kalaallit kuultitalinnik pinnersaasiorsinnaaneq anguniarlugu isumassarsitinneqarsinnaapput, kuultinik saffiortoq Nicolai Appel naggasiivoq.

Pinnersaatit saqqummersitat pisiarineqarsinnaapput. Assammiut 21 karat-imik kuultitallit 1600 koruuniniit 21.000 koruuninut akeqartinneqarput. Apriilip 29-ata tungaanut pinnersaatit takusarneqarsinnaapput.