Nunatsinneersut EU-mit nersualaarneqarput

Nunat assigiinngitsut peqataaffigissaanik ilinniagaqartut suliaat Nuummi Niuernermik Ilinniarfimmit aqunneqartoq EU-mit nersualaarneqarpoq.
apriilip 27-at 2009 07:10

Qarasaasiat atorlugit attaveqatigiittarnerup aporfigisinnaasai taakkualu nalilersornissaat ilinniagaqartut suliaqarnerminni siunertaraat. Ilinniagaqartut nunatsinnit peqataasut tassaapput Sisimiuni oqaatsinik ilinniarfimmi ilinniartut aammalu Sanaartornermik ilinniarfimmi ilinniartut. Taakkua suleqatigaat Tuluit Nunaanni, Danmarkimi, Finlandimi Islandimilu ilinniagaqartut.

Kulturikkut aallaaviit assigiinngikkaluaqisut ilinniartullu imminnut ungasikkaluaqalutik aaqqissuulluakkamik suleqatigiilluarnikkullu suliartik takutilluarsimavaat. Sulinerminni pissuserissaarsimapput suliartillu aallulluarsimallugu tamatuma kingunerisaanik siunissami atorneqarluarsinnaasunik naammassissaqarsimallutik, ilinniagaqartut suliaat pillugit EU-mi naliliisinneqartut taama allapput.

Ilinniagaqartut suliaat misilitaallu aallaavigalugit, suliat nanginneqarnissaat siunertaralugu Sisimiuni Oqaatsinik Ilinniarfik Niunermilu Ilinniarfik EU-mut nutaamik qinnuteqarput.