Nunatsinneereerlunilu Bush-i sakkortuumik kajumissaarpaa

USA-mi Innuttaasut sinnerlugit sinniisoqarfimmi, tassa Repræsentanternes Hus-imi, siulittaasoq, demokrateq, Nancy Pelosi, Ilulissani tikeraareerluni Europamut maanna tikereerpoq.

Silaannaap kissatsikkiartornera takoreerlugu politikeri taanna nuimasoq attortissimaqisoq takuneqarsinnaavoq.

Berlinimi ippassaq oqalugiarnermini præsident Bush qamannga pisumik kajumissaarpaa, nunanik pisuunerpaanik taaneqartartut arfineq pingasut, G8-t, siulittaasui Tysklandimi sapaatip akunnerata tulliani ataatsimeersuaqatigilerunigit silaannaap allanngoriartornera pillugu apeqqutit oqaluuserisassallu pingaarnerit ilaattut inisseqqullugit.

- Kalaallit Nunaanni tikeraarninni nammineerlunga takuara, silaannaap allanngoriartornera kalaallinut inuiaqatigiinnut ulluinnarni qanoq sunniuteqartigisoq, piniarnerannut, aalisarnerannut aningaasaqarniarnerannullu sunniuteqarpoq. Pinngortitallu allanngoriartorneranut, tamatumalu nassatarisaanik ajornartorsiutinut, kalaallit pisuussuteqanngillat. Nunarsuarmioqataasunuku, taakkulu inooriaasiat, pisuusut, Nancy Pelosi, oqarpoq. Tamanna atuarneqarsinnaavoq netavisen earth naggat org-mi.

- Piffissanngorpoq nunani pisuuneersaajusugut akisussaaffipput takutittariaqaleripput, neriuppungalu USA-mi qullersat paasissagaat maannamut iliuuserisimasatsinnit annertunerusumik iliuuseqartariaqartugut, Pelosi naggasiivoq.