Nunat tamat isumaqatigiissutaat ataqqineqaqquaat
Nunani issittuni nunat tamat inatsisiliaasa ataqqineqarnerulernissaat inuillu pisinnaatitaaffiisa saqqumilaarnerulernisaat Danmark-ip Norgellu sulissutigilerpaat aviisi Sermitsiaq nittartakamini allappoq.
Nunani issituni susassaqarfinni ataatsimoorussaqarfiusuni oqaluttuarisaanermi pingaaruteqarput. Avatangiisit pinngortitami pisuussutit nunallu inuvii pillugit isumagineqartillugit Norskit nunanut allanut ministeriat Jonas Gahr Støre danskillu nunanut allanut ministeriat Per Stig Møller ullumi ataatsimeeqatigereerlutik oqarput.
Nunarsuarmioqatigut takutittariaqarpagut issittumi pissutsit ajunngitsuusut inatsisaatsuliortoqanngitsorlu, malitassat assigiingitsut malinneqartussaapput, inuiaat imaanilu pisinnaatitaaffiit eqqarsaatigalugit, Støre erseqqissaavoq.
Danmark maajip qaammataa naalerpat Kalaalit Nunaanni ataatsimiisitsinissamik aggersaavoq, ataatsimeeqatigineqassapput Norge USA Canada Rusland-ilu.
Canada Rusland-ilu qalasersuup eqqaani pisuussutinik piginnittuujumanerat nunani avannarlerni ernummatigineqarpoq. Rusland-ip erfalasuni qalasersuup eqqaanut immap naqqanut ikkusimavaa. Canada pilersaaruteqarpoq, sakkutooqarfiliorniarluni angallatinillu issittumi nakkutiliisussanik atorneqarsinnaasunik nutaanik sananiarluni.
