Nunat tamalaat ministerii nunatsinnut qaaqquneqartut
Avatangiisinut ministerit Kinamiit, Indiamiit, Brasiliamiit Sydafrikameersullu namminneq isitik atorlugit sermeq aattoq takusariaqarpaat. Taamaattumik Danmarkip ministerit taaneqartut nunatsinnut aappaagu qaaqquniarpai, aggersinnaanerannullu periarfissarissaartoq, qallunaat avatangiisinut ministeriat Connie Hedegaard oqarpoq.
Nalagaaffiit peqatigiit qanittukkut silaannaq pillugu Argentinami Boinos Airesimi ataatsimeersuartitsimmat Connie Hedegaardip nunat siuarsagassat siuttui ataatsimeeqatigai. Tamanna iluatsillugu issittumi silaannaap allanngoriartornerata takutinnissaa qaaqqusinermut siunertaavoq. Qaaqqusinerlu periarfissarissaarpoq.
- Paasinnilluartoqarnissaa kissaatigisimavarput, takusinnaagatsigu naalagaaffiit peqatigiit suleriaasianit allaanerusumik naapeqatigiinnissaq pisariaqartinneqartoq, Connie Hedegaard nassuiaavoq
Siunertarineqarpoq nunat siuarsagassat nunallu siuarsimasut ministerii 20-25 missaanniittut persuarsiutaanngitsumik Kalaallit Nunaanni ulluni arlalialunnguani oqaloqatigiissinnaanissaat.
Silaannaq pillugu Argentinami ataatsimiinnermi apeqqutit annersaraat, silaannaap kissakkiartornera pillugu nunarsuarmi suliniutit qanoq ittuunissaat.
Taamaalillutik nunat issittumut ungaseqisumi najugallit sermersuup aakkiartornera pillugu paasinninneq annertunerusinnaassammat. Issittumimi silaannaap kissatsikkiartornera nunarsuup sinneranut naleqqiullugu marloriaammik sukkanerusumik kissatsikkiartormat.