Nunat tamalaat inuii isumasioqatigiipput

Nunat tamalaat inuiisa ilinniarfiat, ITCIP, ulluni makkunani Nuummi isumasioqatigiissitsivoq, ilitsersuisuallu oqarpoq Kalaallit Nunaat maligassiuilluartuusoq:

- Isumaqarpunga Kalaallit Nunaat nunarsuaq tamakkerlugu nunap inuiisa inatsisartuinit, allaallumi Naalagaaffiit Peqatigiit iluanni, maligassatut isiginiarneqartoq. Nammineq aalajangiinissamut pisinnaatitaanerup sulissutigineqarneranut, namminersortuunermut, pisinnaatitaaffiillu tunngaviulluinnartut allat sorsuutigineqarneranut Kalaallit Nunaat malinniarneqartariaqartutut isigaara, isumasioqatigiinnermi ilitsersuisoq, Hawaii-miu Mililani Trask oqarpoq.

Nunap inuii Bangladesh-imeersut, Indiameersut, Niger-imeersut, Guatemala-meersullu isumasioqatigiinnermi peqataasunut ilaapput. Nunat peqataatitaqartut katillutik 15-iupput, inuillu isumasioqatigiinnermi peqataasut katillutik 20-ullutik.

Nunat assigiinngitsut akornanni inuiaqatigiit qanoq ingerlanneqartarnerat, nunallu inuiisa pisinnaatitaaffiisa suunerat ilinniartarpaat, soorluttaaq Naalagaaffiit Peqatigiit qanoq ingerlanneqarnerat, nunallu tamalaat allat suliniaqatigiiffii ingerlanneqartarnerat ilinniarneqartarluni.

Kalaallit Nunaallu takussutissaqqissuusoq Mililani Trask-ip oqaatigaa:

- Aammik kuisinertaqanngitsumik namminersorneq atorluarneqarsinnaasoq, nunap inuiisa aqutsinermik misilittagaqarluarsinnaasut, nunasiaasimanerullu iluamik qaangeriartuaarneqarsinnaanera Kalaallit Nunaata takutereerpaa, taamaasilluta suleqatigiinnikkut naligiinnerulerneq angusinnaavarput, Mililani Trask oqarpoq.

Suliniaqatigiiffik ITCIP seminariami rektoriusimasumik Ingmar Egede-iugaluamit 1997-imi pilersinneqarpoq.