Nunat tamaalaat qilalukkanik pisasseeqqinneq aalassassutigaat

decembarip 19-at 2006 10:33

Qilalukkanik pisassarititaasunik nunatsinni Naalakkersuisut qilalukkanik 100-nik ilasinerat maanna nunani tamalaani isornartorsiorneqalerpoq.

Qilalukkat pisassaritaasut 285-iniit qummut 385-inut qaffatsinneqarnerat nunanut tamalaanut uisaallatitsivoq, taamatullu aalajangersimaneq Kalaallit Nunaanni piniapiluttoqarnerarlugu oqaatiginiarneqarpoq.

Maannalu Tysklandimi uumasunik illersuiniaqatigiit Pro Wildlife-kkut qernertanik qilalugarniarnermut akerliunertik nalunaarutigaat.

- Kalaallit Nunaanni qilalukkut nungutaanissaat aarlerinarpoq, taama tyskit nutaarsiassaqarfiisa ilaannut oqarpoq immami uumasunut immikkut ilisimasalik Sandra Alther.

Qilalukkat amerlassusaat pillugit biologi danskiusoq Thor Hjarsen aammattaaq misissuisimavoq.

Taassuma eqqoriarpaa, Kalaallit Nunaata eqqaani qilalukkat qernertat 5500-t 7800-llu akornanni amerlassuseqarsimassasut.

Qilalukkanik qernertanik pisassiineq nunatsinni pinngortitaleriffiup NAMMCO-llu innersuussutaat malinnagit aalajangiineruvoq.

Tamakku saniatigut nunatsinni ukioq manna qilalukkap saarnginik pinnersaasiat nunanut EU-mut ilaasortanut eqqunneqaqqusaajunnaarallarput.

Taamatullu eqqusseqqusiunnaarallarneq pivoq Hollandi EU-p kommissionianut kalaallit piniagaat pillugit saaffiginnissuteqareersorlu.

Hollandip taama saaffiginninnermigut apeqquserpaa Kalaallit Nunaat piujuaannartitsinissamik tunngaveqarluni ilumut qilalugarniartarnersoq.