Nunat suliffissuaqarfiusut annerit 20-t, tassa G20-mi ilaasortat Argentinap illoqarfiisa pingaarnersaanni Buenos Airesimi ataatsimiinnerat naammasseqqammerpoq, USA-llu Kinallu niuernikkut aaqqiagiinngissuteqarnerat oqaluuserineqartunut ilaalluni.

Nunat aningaasarsiorfiusut annerit 19-it EU-lu ataatsimiinnermi naggasiutitut ataatsimoorullugu inernerineqartumik isumaqatigiissuteqarput.

Nunat akornanni niueqatigiinnermi assigiinngitsutigut aaqqiagiinngissuteqartoqartoq nunat G20-mi ilaasortat naalakkersuisuisa isumaqatigiissutigaat, soorlu aamma nunat tamalaat niueqatigiinnikkut suleqatigiiffiata WTO-p aaqqissuuteqqinneqarnissaa isumaqatigiissutigigaat.

Nunat silap pissusiata allanngoriartornerata akiorniarneqarnissaanut Parisimi isumaqatigiissummik atsioqataasimasut, isumaqatigiissummi anguniarneqartut suli attakkusullugit oqaatigaat.

G20-t ataatsimeereerneranni USA-p præsidntia Donald Trump, Kinallu præsidentia Xi Jinping nereqatigiipput, naapinnerallu qanimut malinnaavigineqarluni.