Nunat Qalasersuarmut qanittumiittut ataatsimiigiaqquneqarput

Naalakkersuisut siulittaasuat, Hans Enoksen, aamma Danmarkimi nunanut allanut ministeri, Per Stig Møller, Norgemut, USA-mut, Canadamut Ruslandimullu qaaqqusissummik nassitsipput, Ilulissanut aappaagu maajip ulluisa 27-anniit 29-at ilanngullugu ataatsimiigiaqqusillutik.

Siunertaavoq nunat taakku sisamat, taavalu Kalaallit Nunaata/Danmarkillu, Qalasersuup imartaa pillugu eqqissisimasumik immikkoortiterinissaat, silallu pissusaata allanngoriartornerata akiorneqarniarnissaanut nukiit atorneqassasut, assortuunnermut atornagit.

-Kina siulliulluni erfalasuliinersoq apeqqutaanngilaq. Illersornissamut ministeri Tartupalummukartinneqarnersoq imaluunniit russit Qalasersuup naqqani erfalasulersimanersut qaquguluunniit apeqqutaatinneqassanngilaq, ajornartorsiut taama aaqqinneqarsinnaanngilaq, Per Stig Møller oqarpoq.

Qalasersuaq pillugu assortuunneq silap pissusaata allanngoriartornera ilutigalugu aallartippoq. Sikup aakkiartornera ilutigalugu tamaani uuliamik gassimillu piiaanissaq ammaanneqarpoq.

Canada avannaqqullugu ungasinngitsukkut Sullualukkoortoqarsinnaalersussaavoq.

Rusland Qalasersuup imartaata naqqani aggustimi erfalasuliivoq, Canadalu nalunaareerpoq qeqertaaluup Baffin Islandip avannarpasissuata sineriaani sakkutooqarfiliorniarluni pilersaarutigalugu.