Assi: Johan Villadsen

Nunat nunanut allanut tunngasunut ministeriunngitsunik Ilulissanut ataatsimiigiartitsisut

Naalagaaffeqatigiittut nunanut allanut tunngasunut ministerinik Ilulissanukartitsiniartut, nunat allat, soorlu Rusland, USA Canadalu atorfilittanik nunanut allanut tunngasunut sulialinnik aallartitsiinnassapput. – Oqaluuserisassat pingaaruteqarpallaanngitsut, issittumut tunngasunut lektori naliliivoq.

Nunat pisoqassatillugu katersuuffiusut, tassa nunatta Danmarkillu, nunanut allanut tunngasunut naalakkersuisunngorlaaq Vivian Motzfeldt nunanullu allanut tunngasunut ministeri Anders Samuelsen allartippaat Savalimmiullu nunanut allanut tunngasunut ministeri Poul Michelsen aallartillugu.

AAMMA ATUARUK Suka Ilulissani ataatsimeersuarnissamut qaaqqusisoq

Nunalli peqataasut sinnerisa appasinnerusunik inissisimasunik aallartitsissallutik aalajangerput. Ruslandip nunalerinermut ministerip tullersortaa aallartippaa. USA-p Canadap, Finlandip Islandillu aallartitatik issittulerisut ataatsimiigiartippaat, Norgep nunanut allanut tunngasunut ministerip tullersortaa naalagaaffiullu allattaa Audun Halvorsen aallartippaa.

Sverige nunanit taakkunanit kisiartaalluni ministerimik aallartitsivoq – kisianni taamaallaat nunaqarfinnut ministeri, Svend-Erik Buch aallartillugu.

Lektor: Oqaluuserisassani pingaartortaqanngilaq

Nuimasut ataatsimiigiartut ikittuinnaaanerannut, nunat peqataasut Ilulissani 2008-mi isumaqatigiissutimik suli atuuneranik uppernarsaqqittussanerannik peqquteqarneruvoq.

Ullormulli oqaluuserisassat pingaarutilimmik nutaartaqanngitsut, Danmarkimi Illersornissamut ilisimatusarfimmi lektori, Issittumullu tunngasunik ilisimasalik Jon Rahbek-Clemmesen isumaqarpoq.

- Pingaarutilimmik aalajangiinissamik nalunaarummilluunniit nutaamik isumaqatigiissuteqarnissamik soqanngilaq. Ataatsimiinnermi taamaallaat nalunaarutip (Ilulissani-nalunaarut aaqq.) ukiut qulit matuma siorna pilersinneqarsimanerata qanoq ajunngitsiginera oqallisigineqartussaalluni.

2008-mi ataatsimiinnermi ingammik attanneqarsinnaasumik aqutsinisssaq issittullu akersuuffiunnginnissaa pillugit isumaqatigissusiornissaq siunertaavoq. Ruslandip nunanut allanut tunngasaunut ministeria aamma Canadap pinngortitami isumalluutinut taamani ministeria, Gary Lunn, taamani peqataasunut ilaapput.

AAMMA ATUARUK Rusland Ilulissani ataatsimeersuarnissamut suli tikilluaqqusaasoq

Jon Rahbek-Clemmesen naapertorlugu Ilulissani nalunaarutip ukiunik qulinngortorsiutiginisssa peqqutissaqarluarpoq.

Minnerunngitsumik Rusland nunallu killiit nunarsuatsinni sumiiffinni allani, soorlu Ukrainimi akerleriissuteqarmata. Issittumilu eqqissisimasoqarnera ima patanartiginngilaq, allaat ministerpassuit takkuttariaqarlutik, Jon Rahbek-Clemmesen isumaqarpoq.

- Ilulissani nalunaarummi tunngaviusumik oqariartuutigineqartoq, tassalu naalagaaffiit issittumi unammillernartunik suleqatigiissinnaasut, taavalu issittumi akerleriissuteqariartortoqannginnera, ukiuni qulini kingullerni immaqa oqqassutissaqqikkunnaariartorsimavoq.

Allamilli nutaartaqarpoq, tassa Finland, Island Sverigelu tamatumuuna peqataapput. Nunat taakku pingasut Issittumut sineriaqannginnerat pissutigalugu 2008-mi qaaqquneqanngillat.

AAMMA ATUARUK Udenrigsminister vil holde arktisk dialogmøde i Ilulissat

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat