Nunat namminersulersimasut Nunani Avannarlerni suleqataanerulernissaat ammaanneqarpoq
Ålandimi isumaqatigiissutip siunertaraa nunani avannaamioqatigiinni nunat namminersulerfiusut, nunani avannarlerni suleqatigiiffiusut siulersuisuini ersarinnerusumik suleqataasalernissaat.
Alloriarnerup nutaap Ålandi, Savalimmiut Kalaallit Nunaallu Nunat Avannarliit ministeriisa aalajangersaasartut aallutaqarfiini ersarinnerusumik suleqataasinnaanngortissavai.
-Sunniuteqarsinnaalernitsigut Nunani Avannarlerni suleqatigiinnermut sanarfeqataasinnaanerulissaagut, taama oqarpoq Aningaasaqarnermut Nunanullu allanut tunngasunut naalakkersuisoq, Aleqa Hammond.
Kulturi eqqarsaatigalugu Kalaallit Nunaat aamma anginerusumik sunniuteqarsinnaatitaalerpoq, minnerunngitsumik paarlaasseqatigiittarneq, aammalu eqqumiitsuliornikkut kulturikkullu suleqatiginnerit eqqarsaatigalugit.
-Naalakkersuisut eqqarsaatigiumaarpaat Kalaallit Nunaata suleqatiginnermi suut akuuffiginiassanerai, Aleqa Hammond oqarpoq. Aleqa Hammondip naatsorsuutiginerarpaa Kalaallit Nunaat aamma Norforskip siulersuisuinut ilaasortanngoqquneqarumaartoq, suleqatigiiffimmi tassani issittumi ilisimatusarnerup eqeersaatigiuarnissaa pisariaqarmat.
