Nunat namminersorfiusut siunissaat eqqartorneqartussanngorpoq
Nunat avannarliit siunnersuisooqatigiiffianni ilaasortat qaammatip uuma naanerani ukiumoortumik ataatsimeeqatigiilerpata nunat namminersorfiusut siunissaat eqqartorneqassaaq. Naalakkersuinermik suliaqartut, atorfilittat tusagassiortullu katillutik 1000-t missaanniittut 58-issaannik ataatsimiilerunik Folketingip ataatsimiittarfiani tattoqisaatilaarnissaat ilimagineqarpoq.
Kalaallit Nunaat Savalimmiullu namminersorlutik danskit naalagaaffiata ataani ullumikkut ingerlapput, Ålandilu Finlandip ataani namminersorluni ingerlavoq. Tamannali siunissami allanngussagunarpoq. Nunat pingasut taakku ilaasortat allat naligalugit siunissami oqartussaaffilerneqarsinnaanersut ukioq manna ataatsimiinnermi eqqartorneqassaaq. Namminersortutut ilaasortaalersinnaaneq savalimmiormiunit 2003-mi apeqqutigineqarpoq.
Nunat namminersorfiusut nunanillu avannarlermiut suleqatigiinnerisa nalunaarusiorneqarneranni atuarneqarsinnaavoq, namminersorfiusut naalakkersuinermik suliaqartortai ataatsimiinnerni aallartitatut peqataasartussaammata ilaasortanngorsinnaanerat ajornaquteqarunnanngitsoq. Naalagaaffiilli Nunat Avannarliit ministeriisa aalajangersaasartuini ilaasortaasarmata tassani ilaasortanngornissaq ajornakusuussangatinneqarpoq.
”Nunat avannarliit 2006-imi nalunaarusiaat” naalakkersuisut inatsisartunut saqqummiummassuk, pineqartoq pingasunngormat eqqartorneqarpoq. Oqallittoqarpianngilarli. Savalimmiuni misilittakkat tunngavigalugit nunatsinni naalakkersuinermik suliaqartut kingusinnerusukkut ilaasortanngorusunnerlutik nalilersueqqaarusupput. Namminersorfiusut pingasut assigiinngitsumik pineqarnissaat naalakkersuisunit aappaatigut akueriuminaatsinneqarpoq.
Kalaallit Nunaata Savalimmiutuulli ilaasortaalernissaa inatsisartuni ataatsimiinnermi Siumukkut kissaatigalugu nalunaaruteqarput. Nunatta taasisinnaatitaalluni ilaasortaatitaqalernissaa Demokraatit kissaatigaat.
Nunat Avannarliit Siunnersuisooqatigiiffiani siulersuisuni nakkutilliisuutitanilu aalajangersimasumik ilaasortaatitaqarnissaa Inuit Ataqatigiinnit kissaatigineqarpoq. Naalakkersuisut isumaat Atassutikkut isumaqatigaat Kattusseqatigiit Partiiannit nalunaarusiaq nuannaarutigineqarpoq.
Nunat Avannarliit Siunnersuisooqatigiivi oktobarip 28-aniit novembarip aappaata tungaanut ataatsimiissapput. Nunatsinni inatsisartuni ilaasortat sisamat – inatsisartullu aallartitai ataatsimiinnermi peqataassapput. Ataatsimiinneq nittartakkami www.norden.org. malinnaavigineqarsinnaavoq.
