Nunat kiattut Qalasersualerngusaannermut ilaarusupput
Uuliamik soqutiginnipput taannalu aallaavigalugu Sullualuk aqqusaarlugu umiarsuarnik ingerlaartalernissaminnik soqutiginnillutik aviisi Politiken nittartakkamini taamatut allaaserisaqarpoq.
Uulia Kalaallit Nunaanni nassaarineqartussatut ilimagineqartoq naalagaaffissuit arlallit soqutigalugu piareersimalersimapput. Qalasersuarmik piginnittuunerarlutik saqqummertartut soorlu Danmark Canada, Rusland, Norge aamma USA tusagassiuutini samminneqarluartarput, ukiunili kingullerni Kina, India Korea Kujallerlu Qalasersuarmik soqutigittunut ilanngupput.
Issittumi siunnersuisoqatigiinni Arktisk Råd-imi ilaasortat Danmarkip aamma ilaasortaaffigissaani, alaatsinaatsutut inissisimalersut amerlipput, tamassumalu takutippaa naalagaaffiit Kalaallit Nunaannik Qalasersuarmillu soqutiginninnerulerannik.
Nunarsuarmi nunat uuliamik atuinerpaat tullersortaat Kina Issittumi Siunnersuisoqatigiit aalajangiisarnerannut malinnaasalerniarluni alaatsinaatsutut inissisimalerpoq, kingunninngualu Korea Kujalleq persuarsiutaanngitsumik alaatsinaatsutut inissisimalerluni.
