Nunat issittut ulluat

Naalagaaffiit Peqatigiit silaannaap allanngoriartornera pillugu Montrealimi ataatsimeersuarnermi nunanit 180-init amerlanerusunit peqartaaffigineqartumi immikkut ittumik issittup ullua malunnartinniarneqarpoq. ICC sinnerlugu peqataasoq, Carl Christian Olsen radioaviisimut ima oqaluttuarpoq: Ilisimatusarneq nunallu inuiisa ilisimasaat ilaatigut eqqartorpavut.

Allatut oqaatigalugu ilisimatusarnermi paasisat arlallit saqqummiunneqarput, taamaakkaluartorli aamma issittumi inuit namminneq silap kissakkiartornerata kingunerisaanik sunniutaasimasut saqqummiuppaat. Canadamiut piniartut ulluinnarni piniarnerminni misilittakkatik oqaluttuaraat, taakku saniatigut issittumi kulturimik isiginnaartitsisoqarpoq, soorlu qilaatersornermik, torlussornermik, atisanik takutitsisoqarluni kiisalu eqqumiitsulianik saqqummersitsisoqarluni. Carl Christian Olsenip Radioaviisimut erseqqissarpaa, kuldioxidip millissarneqarnissaanut periusissanik nassaarniartoqarnissaa avatangiisinilu nalimmassarnissarput ataatsimiinnermi pingaarnerpaatinneqarmata.