Nunat issittormiut Siunnersoqatigiivinut ilaasortaaneq iluaqutaavoq
Kalaallit Nunaat, Nunat Issittormiut Siunnersuisoqatigiiffiannut ilaasortaavoq Danmarkip naalagaaffia sinnerlugu. Issittormiut Siunnersuisoqatigiiffiannut ilaasortaaneq, annertuumik nunatsinnut iluaqutaasoq Kuupik Kleistimit oqaatigineqarpoq.
- Issittumik siunnersuisoqatigiit qujanartumik nunatsinnut, aammalu inuiaqatigiinnut ikittuinnarnik inulinnut iluaqutaasorujussuuvoq. Ilaatigut ilisimatuussutsikkut misissuinerit annertuut, uagut nammineq suliarisinnaanngisagut aningaasassaqartinngisavullu suliarisaramikkit, Kuupik Kleist oqarpoq.
Nunat arfineq pingasut Issittumi Siunnersuisoqatigiinnut ilaasortaapput, taamaammat Kalaallit Nunaat tusaaneqarnissaa mikinngitsumik malunnartinniarneqartartoq Kuupik Kleistimit oqaatigineqarpoq.
- Qularutigineqassanngilaq nunarput nunatsinninngaaniillu isummat, Issittumi Siunnersueqatigiinnit annertuummik maluginiarneqartarmata, Kuupik Kleist oqarpoq.
Pinngortitaq avatangiisivullu, eriagineqarnissaat paarilluarneqarnissaallu aamma pingaartitanut ilaapput. Tamannalu aamma, maajip aqqaneq aappaanni ataatsimiinissamut oqaluuserineqassasut Kuupik Kleistimit oqaatigineqarpoq.
- Immap sikusarnerata annikilliartornera ilutigalugu, illersuiniarnernut suliniutit annertusaavigineqarput. Massakkullu suliniutinut tulliuttunut ilaavoq, ilaatigut imartat sorliit immikkut isiginiarneqarnissaat, Naalakkersuisut siulittaasuat Kuupik Kleist taama oqarpoq.
