Nunat inuiisa pisinnaatitaaffii oqaluuserineqarput

Nunat inuiisa ulluinnarni inuunerannut attuumassuteqartunut aalajangiisoqassatillugu, nunat inuiisa pisinnaatitaaffii, Naalagaaffiit Peqatigiit Genevemi allaffeqarfianni sapaatip akunnerani uani ataatsimiinneranni, ullormut oqaluuserisassanut ilaapput.
juulip 16-at 2010 04:54

Nalunaarusiaq Nunarsuarmi Nunat Inuiisa Pisinnaatitaaffii pillugit Ilisimasanik Katersuiffimmit suliaavoq. Katersuiffik taanna taaguuteqartinneqarpoq EMRIP. Aalajangiiniarnerni nunap inuiisa pisinnaatitaaffiisa oqaluuserineqartarnerisa qeqqata missaanut pinerata ineriartorteqqinneqarnissaa nalilernissaalu uani anguniarneqarpoq.

- Nunap inuiisa najukkaminni ulluinnarni inuunerannut attuumassuteqartunik aalajangiisoqassatillugu nunap inuiisa qanoq peqataatinneqartarnissaat Naalagaaffiit Peqatigiinnit 2007-imi akuersissutigineqarpoq, Inuit Issittormiut Siunnersuisoqatigiiffianni, ICC-mi, siulersuisunut ilaasortaq Inuit Ataqatigiinnilu allatsi, Hjalmar Dahl, oqarpoq.

EMRIP tallimanik ilaasortaqarpoq, ataatsimiinneranilu Naalagaaffiit sinniisaat, nunat inuiisa sinniisaat, immikkullu ilisimasallit kattuffiillu assigiinngitsut alaatsinaatsutut oqaaseqarsinnaallutik peqataasinnaapput.

Ataatsimiinneq ataasinngormat aallartippoq, ullumi naammassissalluni.

Nunat Issittormiut Siunnersuisoqatigiiffiat Nuummi sapaatip akunnerisa pingasut matuma siorna ataatsimiimmat, Hjalmar Dahl siulersuisuunernut ilaasortanngorpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq