Nunat inuii FN-mi katersuupput

Naalagaaffiit Peqatigiit Nunat Inoqqaavi pillugit Siunnersuisoqatigiiffianni ilaasortaq, Aqqaluk Lynge massakkut New Yorkimiippoq, nunat inoqqaavisa qullersai nunanit tamalaaneersut ataatsimeeqatigiartorlugit. Ataatsimiinnermi oqaluuserineqassaaq "Nunat Inoqqaavisa Pisinnaatitaaffii pillugit Nalunaarutip" atuuttussaanngortinnissaanut periusissat.

Nalunaarut, Naalagaaffiit Peqatigiit Inuit Pisinnaatitaaffii pillugit Siunnersuisoqatigiivini aasaq akuerineqartoq atuutilissaguni, FN-p Ataatsimeersuarnerani naalagaaffinnit ilaasortaasunit akuerineqaqqaartariaqarpoq. Nalunaarut ukiarmi taasissutigineqarmat, naalagaaffiit akerliusut amerlanerussuteqaqqalaarmata aalajangiinissaq kinguartinneqarpoq.

Nunat inoqqaavisa kattuffiinit aallartitat New Yorkimi ataatsimeeqatigiittut 30-upput.

-Ataatsimeeqatigiinnerup siunertaraa paasiniassallugu qanoq ililluni Nalunaarut FN-p ilaasortaanit amerlanerussuteqalersinnaassanersoq. Suliasssaq inmaannanngitsoq, Aqqaluk Lynge ataatsimeeqataasoq oqarpoq.