Nunat inoqqaavisa ulluat

Nunarsuarmi nunat inoqqaavisa aqagu arfininngorneq aggustip qulingiluaat ulloraat, ullorli Naalagaafiit Peqatigiit qullersaqarfiani, New Yorkimiittumi ullumi nalliussineqarpoq, qulequtaralugu ”Nunat Inoqqaavisa Naalagaaffiillu akornanni oqaluttuarisaanermi pisimasut isumakkeerfigeqatigiissutiginissaat ataqqeqatigiinnikkullu ingerlaqqinnissaq”.

Nunarsuarmi nunat inoqqaavisa ulluat 15-ssaat taamaasilluni nalliussineqarpoq. Nunat Inoqqaavisa Atugaat Pillugit Isummersoqatigiiffiup siulittaasuata, Victoria Tauli-Corpusip, ukioq manna immikkut pisimasut eqqaavai. Eqqaasaasa ilagaat Australiami nunap inoqqaavi utoqqatserfigineqarnerat.

Aamma Canadami nunap inoqqaavi kusananngitsunik pinneqartarsimanertik pillugu utoqqatserfigineqarnerat kiisalu Japanimi Ainu-t nunap inoqqaavisut inuiaqatigiittullu akuerisaanerat Tauli-Corpusip eqqaavai.

ICC-p FN-imi Suliat pillugit Siunnersuisoqarfiani ilaasortaq Hjalmar Dahl nalliussinermi aamma peqataavoq.