Nunat inoqqaavisa siunnersuisoqatigiiffiannik Obamap pilersitsinera ICC-imit isumalluarfigineqarpoq

- Amerikamiut tamatta, nunarsuarmilu tamarmi præsidentitut atorfimmi qanoq ingerlasoqassanersoq tamatta pissangagisorujussuuarput. Tamatta neriulluarfigisorujussuuarput, neriuppungalu pissamaarutigut piviusunngortinneqarumaartut. Præsidentinngortup nunat inoqqaavinik siunnersuisoqatigiinni ilaasortaasussanik Amerikami sulisussanik toqqaareersimasoq malugereerparput.Toqqarneqartut amerlasoorpassuit qanimut suleqatigaagut.

Siunnersuisoqatigiinni ilaasortaasussanik amerikami nunat inooqqaavinik piffissaq eqqorlugu Barack Obama toqqaasimasoq isumaqarpunga.

Neriuppugut tusaaneqarumaarluta suliagullu aalajangersimasunik qulequtallit Amerikami allaffissornermit nerrivimmut qaqinneqarumaartut, taama oqarpoq Inuit Circumpolar Councilip Præsidentia, Alaskamiu Patricia Cochrane.

- Barack Obamap præsidentinngorneratigut amerikamiut nunarsuullu sinnerani innuttaasut neriunnermik tunivai, taama oqarpoq Inuit Issittormiut Siunersuisoqatigiiffiata Kalaallit Nunaanni siulittaasua Aqqaluk Lynge. Ulloq manna inuiaqatigiinnut kalaallinut angisuumik sunniuteqarumaartoq nalunanngilaq. Pingaartumik silap pissusaata allanngoriartorneranut atatillugu suliniutit Barack Obama siuttutut ingerlatsilernerani suliniutigineqassapput, Aqqaluk Lynge ICC sinnerlugu Obama tikilluaqquaa sulilluarnissaanillu kissaallugu. Inuup ataqqinassusia tunaartaralugu naligiittut suleqatigiinnissaq pingaarnertut oqaatigiumaneqarpoq, ICC-ip Obamamut tikilluaqqusinermi oqaasertaliunneqarpoq.