Nunat inoqqaavi New Yorkimi ataatsimeersuarput
Nunat inoqqaavisa atugaat pillugit Naalagaaffiit Peqatigiinni isummersoqatigiiffiata New Yorkimi qulingiluassaa ataatsimeersuarnerat aallartippoq.
"Kinaassuseq Kulturilu tunaartaralugit Ineriartorneq" qulequtaritinneqarpoq, naggueqatigiillu Inuit ataatsimeersuarnermi peqataapput. Inuit Issittormiut Siunnersuisoqatigiiffiat, ICC, Aqqaluk Lynge siuttoralugu tallimanik peqataatitaqarpoq.
Naalagaaffiit Peqatigiiffiit qullersaata Ban Ki Moonip ammaanermi ilaatigut oqaatigaa
nunarsuarmiut naalakkersuisui nunat inoqqaavisa kulturii kinaassuserlu ataqqillugit ineriartortitsissasut.
Pisariaqarluinnartutut aamma isigaa nunat inoqqaavisa inuiaqatigiittut ingerlaatsiminnik toqqammavigisaat ataqqineqartariaqartoq, Aqqaluk Lyngellu tamanna iluaraa:
- Aalajangiilinnginnermi tusarniaanertigut peqataaneq, avatangiisinillu mianerinninnissaq pillugu suliniutinut peqataaneq, kiisalu aalisarnermi piniarnermilu inuussutissarsiutinillu allanik ineriartortitsinermi kulturikkut eriagisat sequtsernaveersaarlugit ineriartortitsisoqartariaqafrnerannik, FN-ip qullersaata oqariartuutaa uagutsinnut naleqqulluinnarpoq, Aqqaluk Lynge oqarpoq.
Nunatta ineriartornerani mianerisassaqartoq Aqqaluk Lyngep aamma eqqaasitsissutigaa, suliffeqarfissuit nunanit allaneersut matumani eqqaallugit:
- Ilisimasariaqarparput avataaninngaanniit tatineqarneq sakkortoorujussuummat. Taamaattumik suliffeqarfissuit inunnut nalinginnarnut soqutigittaalliornerat sissuerneqartariaqarpoq, ICC Greenlandip præsidentia Aqqaluk Lynge oqarpoq.
Inatsisartunut ilaasortat Akitsinnguaq Olsen, Siumumeersoq, Jane Petersenilu Inuit Ataqatigiinneersoq ataatsimeersuarnermi aamma peqataapput, Issittoq pillugu immikkut ittumik aqagu oqallinnissamut peqataassagamik.
