Nunat inoqqaavi angutitaat annertuumik persuttarneqartarput

Canadami nunat inoqqaavisa, Inuit, indianerit metisillu arnartaasa persuttarneqartarneri oqallisaangaatsiarlunilu allaaserineqartarpoq.

Maannali paasineqarpoq angutinut persuttaasarneq aamma taama annertutigisoq, ilaannilu ajornerulluni.

Arnanik persuttaasarneq pillugu nuna tamakkerlugu misissuinissaq maanna aallartilermat, siunnersuutigineqarpoq misissuinermi angutit qanoq inissisimanersut aamma missorneqassasoq.

Angutinut persutaaneq arnanullu persuttaaneq assigiinngitsuusut assigiinngitsumillu sammineqartariaqartut pisortat inerniliipput.

Assigiinngissusaat anneq tassaavoq arnanut persuttaaneq kinguaassiornermut tunngasuusarmat angutinullu persuttaaneq tassunga attuumassuteqarneq ajorluni.

Angutinut persuttaaneq angutillu persuttaasarnerat atuarfinni nerisaqarfiullutillu ineqarfiusuni sakkortuumik pineqartarnerup, angutit angerlarsimaffii persuttaaffiusut, imerajuttunerup ikiaroornartullu kingunerattut isigineqarput.

Angutinillu naggueqatigiinnik assigiinngitsunik politiit assigiinngisitsisarlutik. Politiit namminneq nassuerutigaat.

Persuttaaneq angutillu imminnut atanerat kisitsisini takuneqarsinnaapput, soorlu nunap ilaani Quebecimi angutit paarnaarussat naggueqatigiit Inunneersut indiaanerillu Canadamiunit allanit marloriaammik amerlanerupput. Nunallu ilaani Saskatchewanimi kisitsisit suli annertunerupput, tassanimi angutit paarnaarussat nunat inoqqaavineersut Canadamiunit allanit arfineq marloriaammik amerlanerummata.

Tamanna pillugu arnat persuttarneqartarnerat pillugu misissuisoqareerpat immikkut angutit pillugit misissuisoqarsinnaavoq.