Nunat CO2-mik mingutsitsinerpaat ilaat peqataarusulerput
Kiina Indialu nunani CO2-mik mingutsitsisorujussuarni kingullersaallutik atsioqataanermikkut aalajangersakkamut peqataanertik uppernarsarpaat. Tamanna pivoq Naalagaaffiit Peqatigiit silap pissusaanut allaffeqarfiannut Bonnimiittumut allagaqaateqarnermikkut.
Kiinamit allakkani allassimavoq, Naalagaaffiit Peqatigiit, Kiina silap pissusaa pillugu ataatsimeersuarnermi aalajangersakkamut tapersersuisutut ilanngussinnaagaat.
Københavnimi aalajangersagaq pisussaaffiliisumik isumaqatigiissutaanngilaq, tassani nunat tamalaat neriorsoqatigiipput nunarsuatsinni silap kiatsikkiartornerata 2 gradit ataallugit taamaallaat qaffariarnissaa anguniarneqassasoq - aamma nunat ineriartortut 2020-mi 550 milliardit koruuninik ikiorserneqassasut.
Silap pissusaa pillugu Københavnimi ataatsimeersuarnermut isornartorsiuisut isumaqarput, Københavnimi aalajangersagaq amigaateqaqisoq pisussaaffiliinngitsorlu, aamma gassinik silaannarmik kissakkiartortitsisunik mingutsitsinermik minnerulersitsinavianngitsoq.