Nunat avannarliit ukiuni 20-ni
Kalaallit Nunaata ukiuni 20-ni Nunanut Avannarlernut ilaasortaanerani kalaallit tusaaniarneqarnerat ineriartortinneqarsimaqaaq, pingaartumillu Islandip ukioq kingulleq nunanut avannarlernut killernut siulitaasuuneratigut Kalaallit Nunaata peqataanerata siuariartortinnera aqqutissiorneqarsimavoq, danskillu ukioq nutaami Nordisk Rådimi siulittasunngorneratigut tamanna nanginneqassasoq, nunanut avannarlernut naalakkersuisutta Josef Motzfeldtip qularinngilaa.
Nunat avannarliit killiit Nordisk Rådimi akisussaassutsikkut siuarsimassutsikkullu qanoq inissisimanerat misissorneqarsimavoq, Islandillu suliaa tamanna assut nersualaartariaqartoq Josef Motzfeldt oqarpoq.
2007-08-milu issittumi ilisimatusarnerup annertusaavigineqaqqinnissaa nammineq naalakkersuisuunermi nalaani suliniutaasimasoq ukiumi tullermit piorsaaffigineqalissasoq Josef Motzfeldtip oqaatigaa, tamatumanilu inuit atugaannik misissuineq, aamma aningaasanuinnaq tunnganngitsoq, inuppalunnerusumillu misissuinissaq pilersaarutinut ilanngutereersoq Islandip suliniutaanut ilaavoq.
Aamma Danmarkip ukiortaamit Nordisk Rådimi siulittaasunngornissaanut atatillugu Kalaallit nunaata naalakkersuisuinit siunnersuutit ilagaat nunat avannarliit nunarsuarmi aningaasarsiornermi isorliunerusutut isigalugit ineriartortinneqarnissaat, taannalu statsministerip Nordisk Rådimi ataatsimiinnermut atatillugu atuakkami naqititamini ilanngussimagaa Josef Motzfeldtip takusinnaanerarpaa, tassuunalu aamma takuneqarsinnaavoq Kalaallit Nunaat Nordisk Rådimut ilaasortanngornermi kingorna avataanit tigooqqaaginnarani nammineerluni suleqataanerulernera isummanillu tunniussuisinnaanera angujartuaarneqartoq, Josef Motzfeldt Nordisk Rådimi ukiuni 20-ni ilaasortaasimanermut atatillugu naliliivoq.
