Nunat avannarliit Siunnersuisoqatigiivini sunniuteqarnerulerusupput
Nunani avannarlerni nunat namminersortut akornanni suleqatigiinnerup pitsaanerusup nunat Nunat avannarliit Siunnersuisoqatigiivini sunniuteqarsinnaanerat annertusisinnaavaa. Periarfissaq taanna atorluarneqartariaqarpoq, taama isumaqarpoq nunat avannarliit suleqatigiinnerannut naalakkersuisoq Palle Christiansen.
Nunat avannarliit Siunnersuisoqatigiivi novembarimi katersuutissapput. Nunatut namminersulersimasutut sunniuteqaqataaniaraanni piareersimanissaq pingaaruteqarpoq.
Taamaattumillu Nunat avannarliit suleqatigiinnerannut naalakkersuisoq Palle Christiansenip suleqatini Savalimmiuneersut Ålandimeersullu ippassaq ataatsimeeqatigalugit.
- Nunatut namminersulersimasutut angorusutaqaraanni, tamatumani naalakkersuinikkut erseqqissunik anguniagaqarnissaq timitalimmillu peqataanissaq pisariaqarput, taama Palle Christiansen ataatsimiinnermut tunngavilersuivoq.
Ataatsimiinneq Tórshavnimi pivoq tassanilu kalaallit suliniutaat nunat akornanni suleqatigiinnermiut nukittorsaataasinnaasoq oqaluuserineqarluni.
Suliniuteqarnermi pineqarput ministerit suleqatigineqartut kisimik ataatsimiittannginnissaat, aammattaarli nunat ministerii inatsisartuinilu ilaasortat nunat avannarliit suliaanni peqataatinneqartariaqarlutik.
Isumassarsiaq taanna Savalimmiuni Ålandimilu ministerit suleqatigineqartut ilassilluarpaat.
- Qularinngilara akornatsinni aammattaarli inatsisartutsinni suleqatigiinnerup nukittunerusup nunani avannarlerni sunniuteqaqataanissatsinnut periarfissavut annertusarumaarai, Palle Christiansen oqarpoq, taallugillu apeqqutit imaanut, avatangiisinut ilinniartitaanermut ilisimatusarnermullu suliassaqarfiusut taakkua iluatinnaatilimmik suleqatigiiffiuisnnaasut.
