Nunat avannarliit Siunnersuisoqatigiivi nersornaasiinersaarsuarmut qaaqqusisut
Nersornaasiinemi taaguuserneqarsimasumi, Ny Nordisk Prisgalla, Nunat avannarliit Siunnersuisoqatigiivi atuakkiortumut, filmiliortumut, nipilersortartumut, pinngortitamut avatangiisinullu tunngatillugu kiisalu meeqqanut inuusuttunullu atuakkiortumut nersornaammik nutaamik tunniussissapput.
Siunnersuisoqatigiinni siulittaaq Marit Nybakk, Weekendavisenimut ima oqarpoq:
- Nunat avannarliit Siunnersuisoqatigiivisa nersorsaasiisarneri ukiunut nutaanut naleqqussarnissaat inunnullu amerlanerusunut nittarsaanneqarsinnaanissaat qangali kissaatigineqarsimavoq. Oscarinilli nersornaasiisarnermut assingusumik nersornaasiisalernitsigut Nunat avannarliit Siunnersuisoqatigiivisa nersornaataanik tunniussisarneq naleqqusarniarparput taamaaliornikkullu Siunnersuisoqatigiit nersornaasiuttagai ataqqinaataaqisut amerlanerusunut nittarsaassinnaalissavagut.
Nersornaatip tunniunneqartartoq aamma nutarneqarsimavoq, taannalu taaguteqarpoq Nordlys - Arsarnerit.
Nersornaasiineq oktobarip 30-iani Operaenimi pisussanngorpat ilaatigut atuakkiortut nunatsinneersut Mariane Petersen aamma Nuka Godtfredsen najuutissapput, taakkumi atuakkiortunut nersornaammut innersuunneqarsimammata, aammattaaq atuakkiortoq danskeq norgemi najugaqartoq Kim Leine, nunatsinni ilisarisimaneqartoq innersuunneqarsimavoq. Ajoraluartumilli nipilersortartumut, filmiliortumut aamma pinngortitamut avatangiisinullu tunngatillugu nunatsinnit nersornaasigassatut innersuussisoqarsimanngilaq.
