Nunat Avannarliit Killiit Siunnersuisoqatigiivisa ataatsimiinnissaraluat kinguartinneqartoq
Nunat Avannarliit Killiit Siunnersuisoqatigiivisa ukiumoortumik ataatsimissaraluat kinguartinneqartoq, siunnersuisoqatigiit siulersuisuisa nalunaarutigaat. Islandip inatsisartuisa Reykjavikimi ataatsimiittarfianni, Altingetimi, septembarip ulluisa 15-ianni 16-iannilu ataatsimiittussaagaluarput, coronavirusilli ajornartoortitsinera peqqutaalluni Islandimut angallanneq killilersuiffigineqarmat ataatsimiinnissaraluat taamaatinneqarpoq.
Nunat Avannarliit Killiit Siunnersuisoqatigiivi tusagassiutinut taama nalunaaruteqarput.
Kalaallit Nunaanni, Islandimi Savalimmiunilu inatsisartut Nunat Avannarliit Killiit Siunnersuisoqatigiivinut sinniisuutitaqartarput. Nunat Avannarliit Killiit soqutigisaat Siunnersuisoqatigiinni suleqatigiissutigineqartarput. Inatsisartut siulittaasuat Siumumeersoq, Vivian Motzfeldt, siulittaasup tulliata aappaattut inissisimavoq.
AAMMA ATUARUK Nunat Avannarliit Killiit Siunnersoqatigiivi ukiumoortumik ataatsimiittut
Nunat Avannarliit Killiit Siunnersuisoqatigiivisa ukioq manna ukiap ingerlanerani ataatsimiinnissaat aalajangiusimaneqarpoq, oktobarimilu novembarimiluunniit ataatsimiinnissaat ilimagineqarluni. Assigiinngitsutigut killilersuisoqartariaqarsinnaassaaq, ataatsimiinnerlu internetti aqqutigalugu aaqqissuunneqartariaqarsinnaassalluni.
Ukiumoortumilli ataatsimiinnissaq taamaatinneqavinneqarnavianngitsoq erseqqissaatigineqarpoq.
