Nunat Avannarliit killiit Siunnersuisoqatigiivi Issittumi Siunnersuisoqatigiinni alaatsinaattutut inissisimalerusuttut
Immikkut sammisaqarluni ataatsimeersuarnermut atatillugu Nunat Avannarliit killiit Siunnersuisoqatigiivi immikkut ittumik ukiumoortumik aamma ataatsimeersuarput. Issittumi Siunnersuisoqatigiinni alaatsinaattutut Nunat Avannarliit killiit Siunnersuisoqatigiivisa inissisimalernissaannik Siunnersuisoqatigiit qinnuteqaataata Savalimmiuni, Nunatsinni Islandimilu naalakkersuisuinit tapersersorneqarnissaa, Siunnersuisoqatigiit kissaatigaat.
Nunat Avannarliit killiit Siunnersuisoqatigiivi tusagassiuutinut nalunaarummi taama ilaatigut allaaserisaqarput.
Nunat Avannarliit killiit Siunnersuisoqatigiivi Issittumi Siunnersuisoqatigiinni alaatsinaattutut inissisimalernissamut siullermik 2014-imi aggustip ulluisa 27-anni qinnuteqarput, qinnuteqaalli suli oqallisigineqarnikuunani.
Ministerit Issittumi Siunnersuisoqatigiit Iqalunni Canadami ataatsimiinneranni peqataammata, alaatsinaattutut inissisimalernissamik qinnuteqaatit aalajangiiffigineqarnissaat ministerit Issittumi Siunnersuisoqatigiit sinnerlugit Fairbanksimi Alaskami 2017-imi upernaakkut ataatsimiinnissaannut kinguartinneqarpoq.
- Qinnuteqaat ministerit 2017-imi ataatsimiinnissaannut atatillugu inatsisartunit assigiinngitsunit naalakkersuisuniillu taamaasilluni aalajangiiffigineqarsinnaassaaq. Qinnuteqaammi akuerineqarnissaa nunat pingasut taakku inatsisartuini naalakkersuisuinilu sulissutigineqarnissaanut piffissaliissaaq, Nunat Avannarliit killiit Siunnersuisoqatigiivi taama allapput.
Nunani Avannarlerni killerni tamat oqartussaaqataanerat Siunnersuisoqatigiit immikkut sammisaqarlutik Islandimi ataatsimeersuarneranni sammineqarpoq, inatsisartut assigiinngitsut Issittumi naalakkersuinermi inissisimanerat immikkut sammineqarluni.
Nunat Avannarliit killiit Siunnersuisoqatigiivi Arctic Circlemik suleqateqarnissamik aamma isumaqatigiissusiorput, Siunnersuisoqatigiinnni siunnersuutit assigisaallu Arctic Circlep ataani isumasioqatigiinnerni immikkullu sammisaqartitsinermi saqqummiunneqartassallutik.
