Nunat avannarliit killiit isumannaallisaaniaqatigiissapput
Inatsisartut siulittaasuat Ruth Heilmann ima nassuiaavoq:
- Nunani avannarlerni killerni qanoq annaassiniartarnikkut sillimaniarnikkullu killiffiusut aammalu pissutsit takullugit juunimi ataatsimiikkatta misigisaqarfigisimavagut, oqarpoq nangillunilu.
- Maanna saqqummiinerit aammalu oqalliseqarnerit nangillugit sillimaniarneq eqqartoqqissavarput, pingaartumik nunatsinnut tunngatillugu.
Umiarsuit alligaluttuinnartut allaallu 3.000-t missaat angullugit ilaasoqartartut nunatta sineriaani angalaleraluttuinnarnerat, tassani eqqarsaatigineqarpoq.
- Sillimaniarnerup qanoq annertusarneqarnissaa aammalu ikioqatigiissuteqarfigineqarnera pillugu aamma tassani eqqartueqqittussaagatta, Ruth Heilmann oqarpoq.
Nunatsinni inatsisartunut ilaasortanit aallartitat, Savalimmiuni Lagtingimit aallartitat aamma Islandip Altingianit aallartitat, Islandimi Grundarfjordurimi ippassaq unnukkut ataatsimiilerput.
Ataatsimiinnermi Norgemiut Sverigemiullu aamma peqataassapput.
Nunat avannarliit Killiit sisamanngorneq ilanngullugu ataatsimiissapput.