Nunat Avannarliit Killiit ataatsimiinnerminni ilinniagaqanngitsut oqaluuseraat
Kommunit sunniuteqarnerulernissaat ilaatigut kissaatigaa. Taama oqaaseqarpoq, Nunat Avannarliit Killiit Siunnersuisoqatigiiffiat, "Nunani Avannarlerni Killerni sulisartunut ilinniagaqarsimanngitsunut ilinniarfissatut periarfissat" pillugit Kangilinnguani ataatsimeereersorlu.
- Ilinniagaqarsimanngitsut aamma inuusuttut inersimasullu pillugit misilittakkat Savalimmiuni, Norgemi, Sverigemi Islandimi Nunatsinnilu ilisimasaqarluartunik peqateqarluta suliarivarput. Tullinnguuttorlu tassaavoq, tamakkua qanoq piviusunngortinniarneqassanersut. Tassa suleqatigiinnerit aallartipput.
Nunatsinninngaanniit soqutigineqartoq tassaavoq ilinniartitseqqinnerit tassa ilinniartitsinerit annertusaavigineqarneri, kisianni aamma Savalimmiuni Islandimilu nunagisaq qimannagu ilinniartitsinerit angisuumik sammineqartareersut, taakkua uatsinnut soqutiginartorujussuupput.
Tassa kommunit sisamaannanngornerisigut, qeqqaninngaanniit aqunneqanngikkaluarluni nunap immikkoortuini suut pisariaqartinneqarpat, suut atorfissaqartinneqarpat suullu inuit pineqartut pisariaqartitaat namminerlu ilisimasaat atorlugit ilinniartitseqqiinerit piginnaanngorsaaqqinnerit qanoq ingerlanneqarsinnaappat.
- Suliffissaaleqinerup ullumikkut annertusiartornera sorsuffigissagutsigu nalunanngilluinnartumik suleqatigiinnissarput pisariaqarpoq. Island massakkut suliffissaaleqinermit angisuumik eqqugaavoq, tassa Islandimi suliffissaaleqisut maanna 10 procentit missaanniikkamik, Savalimmiuni 3 procentiupput Nunatsinnilu 4 procentit missaanniillutik. Tamakkununngalu tunngasut suleqatigiissutigisariaqarpavut.
- Nunatsinni maanna ilinniartitaanerit piginnaasallu annertusaavigineqarnerat ingerlanneqaleruttorpoq. Imaassinnaavoq aqutseriaatsimik nutaamik nassaartugut.
Ullumikkut sulisitsisut aningaasat sulisuninngaanniit pissarsiarisagaat AEB-mik taaneqartartut, ukiumut 30 aamma 40 millionit koruunit akornanniittut, taakku qanoq aqussavavut. Islandimi aningaasat tamakkua aktieselskabinngorlugit suliarivaat. Immaqa nutaavimmik nassaarsinnaavugut nunap immikkoortui inuillu pineqartut, inuit ataasiakkaat sulisitsisut taavalu naalakkersuinermik suliaqartut, pingaasuullutik aqutseriaatsimik nutaamik nassaarniartariaqarput. Taamaalilluta amerlanerpaanut iluaqutaasumik nassaarsinnaanioassagatta, Josef Motzfeldt naggasiivoq.
Nunat Avannarliit Killiit Siunnersuisoqatigiiffiat qaammatip uuma ingerlanerani suliffissaaleqineq ilinniagaqarnerlu annerusumik oqaluuseriniarlugit Savalimmiuni ataatsimeeqqinniarpoq.
