Nunat avannarliit killiit aalisarnermut ministerii Narsarsuarmi ataatsimeersuartut

Nunat avannarliit killiit aalisarnermut ministerii ulluni makkunani ataatsimeersuarnerat Kommune Kujallermit aaqqissuunneqarpoq.

Islandimit, Savalimmiunit Nunatsinniillu peqataaffigineqarpoq, nunatsinniillu naalakkersuisoq Nikolaj Jeremiassen peqataatinneqarluni.

Atorfilittat aalisarnermillu suliniaqatigiiffinneersut peqatigalugit Atlantikup avannaani aalisarnermut politikkip piffissami kingullermi ineriartornera oqallisigalugulu qulaajaaffigissavaat.

Kommune Kujallermit tusagassiorfinnut nalunaarut naapertorlugu,  ataatsimeersuarfigineqartutut kommuni qitiusumik inissisimalluni saqqummiussuinissaminut periarfissarissaassaaq, kommunimillu sinniisuusoq tassaavoq borgmesterip tullersortaa siulleq, Simon Simonsen.

- Kommune Kujallermi kommunalbestyrelsep kissaatigaa aalisarnermut politikki patajaatsumik nukittuumillu ineriartortinneqassasoq, uangalu qularinngilara, Kommunip ataatsimeersuartunut  tikeraartitsisuunera aqqutigalugu aalisarnermut tunngatillugu anguniakkatsinnut sakkussatsinnik pissarsilluassasugut.

- Kommunalbestyrelsep kissaatigaa aalisarnerup ingerlanneqarluarnerata malitsigisaanik nunami suliffiit pinngortartinneqassasut, taamaammat uagutsinnut assut pingaaruteqarpoq nunap immikkoortuani inuuffigisatsinni kissaaterput malunnartinniassallugu, Simon Simonsen tusagassiorfinnut nalunaarummi taama oqarpoq.