Nunat avannarliit Islandimit isornartorsiorneqarput

Islandimi præsidenti isumaqarpoq, Island aningaasatigut ajornartorsiormat Danmarkip nunallu avannarlermiut allat ilaginnarsimagaat, taamaalilluni Island Tuluit Nunaannut Hollandimullu aningaasarpassuarnik akiligassarpassuaqalersillugu.
marsip 08-at 2010 04:16

Præsident Ólafur Ragnar Grimssonip oqaasii, nutaarsiassaqartitsivimmut Ritzauimut Norgimilu aviisimut Aftenpostimut anngupput, Islandip Hollandimut Tuluit Nunaannullu 30 milliardit koruuningajalluinnaat akiitsuni utertissanerai islandimiut arfininngormat taasissutigereeraallu.

Norgimi nunanut allanut ministerip, Jonas Gahr Størep, Islandimi præsidentip oqaasii akueriumanngilai, Islandillu præsidentia isumaqatiginngilluinnarnerarpaa.

- Taama oqarneranut præsidentip ajornartorsiuteqarnera pissutaasimassaaq, Islandimi ilumut ajornartorsiorpoq, Jonas Gahr Støre nutaarsiassaqartitsivimmut NTB-mut oqarpoq.

Islandimi præsidenti, Ólafur Ragnar Grimsson, oqarpoq, Icesave-imut isumaqatigiissut atsiorneqartinnagu, Islandip 13 milliardit koruuningajalluinnarnik taarsigassarsitinnissaanut Danmark nunallu allat avannarlermiut akuersinavianngitsut.

- Nunat avannarlermiut sanilitta tulunnit pukkitsormiunillu aqunneqarnerat ajuusaarutigaara, soorlu Nunat siuarsagassat taarsigassarsiniartarfiat, IMF, aamma taamaattoq, Ólafur Ragnar Grimsson nutaarsiassaqartitsivimmut Ritzauimut oqarpoq.

Islandimiut taasitinneqarnerat Danmarkimi naalakkersuisut ippassaq qisuariarfiginngilaat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq