Nunat Avannarliit Illussaat ulapputigineqaleruttorpoq
Savalimmiormiut, islandimiut kalaallillu peqatigiiffii siunissami suleqatigiinnissaq pillugu ataatsimeeqatigiittalereerput.
Odensemi kalaallit illuutaanni pisortaq Kirsten Mærsk, aamma Nunat Avannarliit illuutaanni pisortaasussaq oqaluttuarpoq, illortik tattuleraluarlugu peqatigiiffiit pingasut taakkua suleqatigilluarneqalereersut. Maajillu qaammataani talittarfimmi festivalertitsinissami kalaallit ilusilersugaasa, savalimmiormiut nipilersortartuisa islandimiullu hiistiisa peqataatinnissaasa piareersarnerat assersuutitut taallugu.
Odensep talittarfiani Nunat Avannarliit illussaata toqqavissaa Odensemi pisortat akuersissutigereerpaat. Illu 25-nik inuusuttunut inissiaqassaaq, tikeraanut marlunnik ineqassalluni, sutorniartarfeqassalluni kiisalu pisiniarfeqassalluni.
Nunat Avannarliit illuanni ullumikkut Kalaallit Illuutaani aaqqissorneqartartut ingerlateqqinneqassapput, kulturikkullu ataqatigiinneq takutinniarlugu Savalimmiormiut Islandimiullu kulturiannut attuumassuteqartunik ilaartorlugit.
Odensemi illussap Københavnimi Nunat Avannarliit illuaniit Kalaallit aallartitaqarfiata inissisimaffianit inuppalaarnerullunilu inunnit naapittarfigiuminarnerusussatut takorloorneqarpoq. Taakkualu saniatigut Atlantikup avanaani pissutsit pillugit qallunaanut paasissutissiisoqartassaaq.
Ilinniartitsisarnissatsinnut periarfissagissaarnerulissaagut. Ullumikkut meeqqat atuarfianni atuartut Kalaallit Nunaanni ullutsinni pisut pillugit ilinniartitsisarpugut, Kirsten Mærsk oqarpoq.
Ukiup ingerlanerani Nunat Avannarliit illussaannik sanaartuisussarsiuussisoqassaaq. Odensep kommunia suliariniakkamut 20 miliuuni koruuninik illukartitsereerpoq, aningaasartuutissallu sinneri Kalaallit Illuutaata maannakkut nassaariniarsarai.
