Nunat avannarliit Atlantikumi suleqatigiiffiat nunatsinneersumik siulittaasortaartoq

Taassuma taarserpaa Savalimmiuneersoq Jákup Mørkøre. Jørn Hansen 2009-mit 2010-mut siulittaasuuffigisaminut taamaalilluni uterpoq. NORA nittartakkamini taama allaaserisaqarpoq.

Komitep decembarip arfernani ataatsimiinnerani Jørn Hansenip siulittaasutut toqqarneqarfiani, siulittaasunngortussap inuusuttut nutaaliortut, inuusuttullu ataatsimut isigalugit najukkami inuussutissarsiutinut annikitsunut peqataatinneqarnissaat pingaartillugu oqaatigaa.

Jørn Hansen Nuummi Rambøll Greenland A/S-imi akademiingeniøritut atorfeqarpoq.

Nunat avannarliit Atlantikumi suleqatigiiffiat tassaavoq Nunat avannarliit ministeriisa siunnersuisoqatigiivisa ataanni nunap immikkoortuinut politikkikkut suleqatigiiffik. Nunarput, Island, Savalimmiut Norgelu suleqatigiiffik ilaasortaaffigaat.