Nunat Avannarliit ataatsimeersualerput
Nunat avannarliit Siunnersuisoqatigiivisa ataatsimeeqatigiittarnerisa 57-sissaat Reykjavikkimi ingerlanneqartussaq ataasinngorpat ammarneqassaaq, tassanilu nunarput sinnerlugu peqataasoqassaaq.
Inatsisartut siulittaasuat Jonathan Motzfeldt, Aningaasaqarnermut naalakkersuisuungallartoq Josef Motzfeldt, Inuussutissarsiornermut naalakkersuisuungallartoq Johan Lund Olsen kiisalu inatsisartuni ilaasortaq Ole Dorph ataatsimeersuarnermut ilaassapput.
Nunat Avannarliit Siunnersuisoqatigiivisa ataatsimiinneranni nunani avannarlerni ministerit oqaluuserissavaat, nunat avannarliit akornanni suleqatigiinneq kiisalu nunani avannarlerni filimiliornikkut, atuakkiornikkut, nipilersornikkut pinngortitamik avatangiisimillu paarsilluartunik nersornaasiisoqassaaq.
Ataatsimiinnissami aamma oqaluuserineqassaaq nunat avannarliit Issittoq pillugu suleqatigiinnerat, tassanilu Nunat Avannarliit ministeriisa aalajangersaasartui pilersaarummik nutaamik 2006-miit 2008-p tungaanut tunngasumik saqqummiussaqassaput.
Nunat Avannarliit Siunnersuisoqatigiiffianut ilaasortaapput Danmark Finland, Island Norge Sverigelu. Nunarput Savalimmiut Ålandillu qeqertai Danmarki Finlandilllu ilaasortaanerat aqqutigalugu peqataasarput.
