Nunat avannarliit ambassadii ikuallappaat
Danskit ambassadeat Syriap illoqarfiisa pingaarersaani Damaskusimiittoq ualeq manna isaaffigineqariarluni ikuallanneqarpoq.
Danskit ambassadeat ikuallammat illoqatai allat, tassaasut Sverigep Chile-llu ambasadii aamma ikuallaqataapput. Taassuma kinguninngua norskit ambassadeat aamma saassunneqarluni ikuallanneqarpoq. Danskit ambassadeat ikuallanneqarmat ambassade-mi sulisut arfinillit sulisimanngitsut nalunaarutigineqarpoq.
Danmarkimi tusatsiakkat naapertorlugit Islamimimik upperisallit koraniat akiniaanertut aqqusinermi ikuallanneqartoq oqallisigineqaleraluarpoq, tamannali eqqunngitsoq Københavnimi politiit nalunaarput. Koranip Danmarkimi ikuallanneqarsimaneranik tusatsiakkat pissutaallutik maanna Damaskusimi ambassadet arlallit ikuallanneqarneranik kinguneqartoq oqaatigineqarpoq.
Danskit Nunanut allanut ministeriat Per Stig Møller danskinut Syriamiittunut kajumissaarivoq Syriamiit aniaqqusilluni. Taassuma saniatigut Syriami pisortat illersuiniarsimannginnerat Per Stig Møller-ip kusananngitsutut nalilerpaa.
